झडशी (वार्ताहर) – पतंगाच्या नॉयलान मांझ्यामुळे दुचाकीस्वार तरुणाच्या गळ्याला गंभीर इजा झाल्याची घटना शुक्रवारी सायंकाळी वडगांव रस्त्यावरील दवाखान्यासमोर घडली. नितीन घोडे (रा. झडशी) असे जखमी तरुणाचे नाव आहे.
सायंकाळी सहाच्या सुमारास नितीन घोडे मोटारसायकलने सेलूकडे जात असताना देवतारे दवाखान्यासमोर नॉयलान मांझा अचानक गळ्याभोवती अडकला. मोटारसायकल वेगात असल्याने मांझ्यामुळे गळ्याला गंभीर जखम होऊन मोठ्या प्रमाणात रक्तस्त्राव झाला. त्याला तत्काळ रुग्णालयात दाखल करण्यात आले.
पतंग उडवण्याच्या हंगामात नॉयलान मांझ्यामुळे वारंवार अशा घटना घडत असून, त्यावर बंदी असतानाही तो खुलेआम विकला जात आहे. प्रशासनाने त्वरित कारवाई करून नॉयलान मांझ्यावर पूर्णतः बंदी आणावी, अशी मागणी सर्पमित्र विशाल सावरकर यांनी केली आहे.
सध्या पतंग उडवण्याच्या काळात नागरिकांनी सुरक्षिततेसाठी विशेष खबरदारी घ्यावी, असे आवाहनही करण्यात आले आहे.
