गडचिरोली: अवैध दारूच्या व्यवसायात गुंतलेली लोकं केव्हा काय करतील याचा काही नेम नाही. दारूबंदी असलेल्या गडचिरोली जिल्ह्यात दारू तस्करीसाठी विविध शक्कल लढविली जात आहे. कधी चारचाकी वाहनात वेल्डिंग ने कप्पे तयार करून,कधी दुचाकी बाईकच्या पेट्रोल टँकमध्ये पेट्रोल ऐवजी चक्क दारूच्या बाटल्या टाकून,तर कधी पार्सल सामनातून दारूची तस्करी केली जात आहे.एका तरुणाने मात्र यावेळी अवैध दारू तस्करीसाठी नवीनच जुगाड केला आहे. त्या तरुणाचा हा नवीन जुगाड पाहून पोलीसही चक्रावले.
नुकतेच २३ जून रोजी सायंकाळच्या सुमारास अहेरी पोलिसांनी बोटलाचेरू येथे अवैध दारू तस्करीवर कारवाई केली.यात एम एच ३३ ए ३७९३ टाटा विस्टा कंपनीच्या कार मध्ये अवैध दारू आढळून आली.पोलिसांनी अवैध दारूसह तब्बल ४ लाख १० हजार रुपयांचा मुद्देमाल जप्त केला.तर मध्य रात्री म्हणजे २४ जून रोजी अहेरी पोलीस रात्रीची गस्त घालताना एम एच ३८ एक्स ३०५५ क्रमांकाचा संशयित महिंद्रा पिकअप वाहन रस्त्याच्या कडेला आढळून आल्यानंतर चालकाला विचारपूस करताच तो वाहन चिडून पडून गेला. त्यानंतर पोलिसांनी सदर वाहनाची तपासणी केली असता त्यात अवैध दारू आढळून आली.पोलिसांनी दारूसह १० लाख ७६ हजारांचा मुद्देमाल जप्त केला. दोन्ही कारवाईत अहेरी पोलिसांनी एकूण १४ लाख ८६ हजारांचा मुद्देमाल जप्त करून चालक नाव मोहम्मद इलियास शेख रा.बालाजी वॉर्ड चंद्रपूर यास ताब्यात घेतले आहे.
ही कारवाई गडचिरोलीचे पोलीस अधीक्षक निलोत्पल, अप्पर पोलीस अधीक्षक (प्रशासन) कुमार चिंता,अप्पर पोलीस अधीक्षक (अभियान) यतीश देशमुख, अहेरीचे अपर पोलीस अधीक्षक एम रमेश, उपविभागीय अधिकारी अजय कोकाटे यांच्या मार्गदर्शनात पोलीस निरीक्षक दशरथ वाघमोडे यांनी केली.
कारच्या डॅशबोर्ड मधून अवैध दारू तस्करी
अहेरी पोलिसांनी जप्त केलेल्या दोन चारचाकी वाहनांमधील टाटा विस्टा कंपनीच्या कारच्या डॅश बोर्डमधून दारू तस्करी केली जात होती. पोलिसांना संशय येताच सदर व्यक्तीला डॅशबोर्डचे नटबोल्ट ओपन करून त्यातून दारू बाहेर काढायला लावली.डॅश बोर्ड आणि बॅनेट मधून तब्बल १ लाख ४० हजार रुपयांची दारू आढळून आल्याने पोलिसांना सुद्धा आश्चर्याचा धक्काच बसला.
