अहेरी : दुर्गम, ग्रामीण आणि आदिवासीबहुल गडचिरोली जिल्ह्यातील विद्यार्थ्यांना योग्य मार्गदर्शन, प्रशिक्षण आणि संधी मिळाल्यास तेही वैद्यकीय क्षेत्रात मोठी भरारी घेऊ शकतात, हे पुन्हा एकदा सिद्ध झाले आहे. एकात्मिक आदिवासी विकास प्रकल्प, अहेरी आणि ‘लिफ्ट फॉर अपलिफ्टमेंट’ (LFU), पुणे यांच्या संयुक्त विद्यमाने राबविण्यात आलेल्या वैद्यकीय प्रवेश परीक्षा प्रशिक्षण उपक्रमाला यश मिळाले असून, ‘उलगुलान’ उपक्रमातील तब्बल सात विद्यार्थ्यांची वैद्यकीय पदवी अभ्यासक्रमासाठी निवड झाली आहे.
दुर्गम भागातील आदिवासी विद्यार्थ्यांच्या मनात डॉक्टर होण्याचे स्वप्न रुजवून ते प्रत्यक्षात आणण्यासाठी हा उपक्रम महत्त्वपूर्ण ठरला आहे.गडचिरोलीच्या आदिवासी पट्ट्यातून सात विद्यार्थी आता वैद्यकीय शिक्षणाच्या दिशेने वाटचाल करणार असल्याने या यशाचे सर्वत्र कौतुक होत आहे.शासकीय माध्यमिक आश्रमशाळा, खमणचेरू येथे वैद्यकीय प्रवेश परीक्षेच्या तयारीसाठी २० दिवसीय निवासी कार्यशाळेचे आयोजन करण्यात आले होते.
या कार्यशाळेत तब्बल २०० विद्यार्थ्यांनी सहभाग घेतला. विद्यार्थ्यांना केवळ परीक्षेचे मार्गदर्शन न देता शैक्षणिक गुणवत्ता, व्यक्तिमत्त्व विकास, आत्मविश्वास, वेळेचे नियोजन आणि स्पर्धात्मक परीक्षेची तयारी याबाबतही प्रशिक्षण देण्यात आले.
कार्यशाळेदरम्यान विद्यार्थ्यांच्या विविध चाचण्या आणि मुलाखती घेण्यात आल्या. त्यातून १५ गुणवंत विद्यार्थ्यांची निवड करण्यात आली. या विद्यार्थ्यांना ‘लिफ्ट फॉर अपलिफ्टमेंट’ संस्थेच्या माध्यमातून ‘उलगुलान’ पुणे तुकडीत दोन वर्षांचे विशेष निवासी प्रशिक्षण देण्यात आले.या प्रशिक्षणाची फलश्रुती आता समोर आली असून, निशांत मल्लेश सिडाम (अहेरी), साहिल टेकाम (गुंडेरा, ता. अहेरी), जीवन मोतीराम सिडाम (दामपूर, ता. मुलचेरा), अरमान होमेश्वर आत्राम (चपराळा, ता. चामोर्शी), काव्या खुशाल कुसनाके (धनूर, ता. मुलचेरा), चंदना रवींद्र उईके (मिचगाव, ता. धानोरा) आणि श्रुती लालसू वड्डे (मलमपोडूर, ता. भामरागड) या सात विद्यार्थ्यांची वैद्यकीय पदवी अभ्यासक्रमासाठी निवड झाली आहे.
एकलव्य शाळेच्या विद्यार्थ्यांची दमदार कामगिरी
विशेष म्हणजे, या सात विद्यार्थ्यांपैकी चार विद्यार्थ्यांनी एकलव्य निवासी विद्यालय, अहेरी येथे इयत्ता दहावीपर्यंत शिक्षण घेतले आहे. एका विद्यार्थिनीचे शिक्षण आलापल्ली येथील ग्लोबल शाळेत झाले आहे. तर दोन विद्यार्थिनींनी एकात्मिक आदिवासी विकास प्रकल्प, भामरागड आणि गडचिरोली अंतर्गत येणाऱ्या विविध आश्रमशाळांमध्ये शिक्षण घेतले आहे.दुर्गम भागातील विद्यार्थ्यांना दर्जेदार शिक्षणासोबत योग्य दिशा, सातत्यपूर्ण मार्गदर्शन आणि आवश्यक सुविधा मिळाल्यास तेही मोठी स्वप्ने पाहू शकतात आणि ती प्रत्यक्षात साकार करू शकतात, याचे सात विद्यार्थ्यांचे हे यश प्रेरणादायी उदाहरण ठरले आहे.
गडचिरोली जिल्ह्यातील तीनही प्रकल्पातील विद्यार्थ्यांसाठी खमणचेरू येथे प्रशिक्षणाचे आयोजन करण्यात आले होते.सदर प्रशिक्षण यशस्वी करण्यासाठी (तत्कालीन) सहाय्यक प्रकल्प अधिकारी एस. डी. वसावे आणि एस. पी. डोंगरे यांनी विशेष मेहनत घेतली. तसेच सहाय्यक प्रकल्प अधिकारी धनराज डबले यांनी यशस्वी विद्यार्थ्यांचे अभिनंदन करून त्यांच्या पुढील वाटचालीसाठी शुभेच्छा दिल्या.
हा उपक्रम पुढेही सुरू ठेवणार
दुर्गम आणि आदिवासी भागातील विद्यार्थ्यांमध्ये गुणवत्ता आणि क्षमता मोठ्या प्रमाणात आहे. त्यांना योग्य व्यासपीठ व मार्गदर्शन मिळणे आवश्यक आहे. ‘उलगुलान’ उपक्रमातून सात विद्यार्थ्यांची वैद्यकीय अभ्यासक्रमासाठी झालेली निवड ही अभिमानाची बाब आहे. भविष्यातही हा उपक्रम सातत्याने सुरू ठेवून अधिकाधिक आदिवासी विद्यार्थ्यांना वैद्यकीय शिक्षणाच्या मुख्य प्रवाहात आणण्यासाठी संधी उपलब्ध करून देण्यात येईल.
-अमर राऊत, प्रकल्प अधिकारी, अहेरी
