मुलचेरा : भारतीय कृषी अनुसंधान परिषद-केंद्रीय कापूस संशोधन संस्था, नागपूर यांच्या वतीने अनुसूचित जमाती विकास कृती आराखड्यांतर्गत मुलचेरा व बोलेपल्ली येथे अनुसूचित जमाती प्रवर्गातील शेतकऱ्यांसाठी एक दिवसीय प्रशिक्षण, कार्यशाळा व कृषिउपयोगी निविष्ठा वितरण कार्यक्रम उत्साहात पार पडला. या कार्यक्रमाचा ७० हून अधिक आदिवासी शेतकऱ्यांनी लाभ घेतला.
केंद्रीय कापूस संशोधन संस्थेचे योजना समन्वयक तथा वरिष्ठ शास्त्रज्ञ डॉ. दिपक नगराळे यांनी योजनेची उद्दिष्टे व रूपरेषा स्पष्ट करत कापूस व धान पिकांवरील कीड-रोगांचे एकात्मिक व्यवस्थापन आणि बुरशीनाशकांचा योग्य व सुरक्षित वापर याबाबत मार्गदर्शन केले.
वरिष्ठ शास्त्रज्ञ डॉ. रामकृष्ण जी. आय. यांनी कापसाची सघन व कमी अंतराची लागवड, वेळेवर कृषी कामे आणि पीक वाढ व्यवस्थापन याबाबत शेतकऱ्यांना सविस्तर माहिती देत शिफारशीत तंत्रज्ञानाचा अवलंब करण्याचे आवाहन केले. तालुका कृषी अधिकारी विकास पाटील यांनी कृषी विभागाच्या विविध योजना, पीक विमा व गटशेतीच्या माध्यमातून मिळणाऱ्या सुविधांची माहिती दिली.
कार्यक्रमादरम्यान बोलेपल्ली येथील अंगणवाडी केंद्र परिसरात पोषण वाटिका उपक्रमांतर्गत विविध रोपांची लागवड करण्यात आली. विद्यार्थ्यांमध्ये पोषण, पर्यावरण संवर्धन व परसबागेचे महत्त्व याबाबत जनजागृती करण्यात आली.यावेळी बोलेपल्ली व देवडा येथील आदिवासी शेतकऱ्यांना कापूस वेचणीच्या थैल्या, विद्राव्य खते, नीम तेल, पीक वाढ नियंत्रक, बुरशीनाशके, कीटकनाशके व कामगंध सापळे आदी कृषिउपयोगी निविष्ठांचे वितरण करण्यात आले.
कार्यक्रमाला डॉ. दिपक नगराळे, डॉ. रामकृष्ण जी. आय., तालुका कृषी अधिकारी विकास पाटील, मंडळ कृषी अधिकारी एस. आर. गरमले, वाय.पी.-१ संचयनी कुंभारे यांच्यासह बोलेपल्ली, देवडा व परिसरातील आदिवासी शेतकरी उपस्थित होते. कार्यक्रमाच्या शेवटी संचयनी कुंभारे यांनी आभार मानले.
