गडचिरोली : जिल्हा परिषदेच्या प्राथमिक शिक्षण विभागाला नवे शिक्षणाधिकारी मिळाले आहेत. परिविक्षाधीन शिक्षणाधिकारी प्रेरक प्रकाश उजगारे यांची १७ ऑगस्ट २०२६ ते १३ मार्च २०२७ या कालावधीसाठी ३० आठवड्यांकरिता शिक्षणाधिकारी (प्राथमिक), जिल्हा परिषद गडचिरोली या पदावर पदस्थापना करण्यात आली आहे.
शालेय शिक्षण व क्रीडा विभागाच्या शासन आदेशानुसार ही नियुक्ती करण्यात आली असून, उजगारे आता जिल्ह्यातील प्राथमिक शिक्षण विभागाची धुरा सांभाळणार आहेत. दुर्गम आणि आदिवासीबहुल गडचिरोली जिल्ह्यात शाळांमधील विविध समस्या, शिक्षकांची उपलब्धता, शैक्षणिक गुणवत्ता आणि विद्यार्थ्यांच्या उपस्थितीसारखी आव्हाने कायम आहेत. त्यामुळे या आव्हानांवर मात करून प्राथमिक शिक्षणाचा दर्जा उंचावण्यासाठी उजगारे यांची भूमिका महत्त्वाची ठरणार आहे.
दरम्यान, विद्यमान शिक्षणाधिकारी (प्राथमिक) बाबासाहेब शंकर पवार यांची इतरत्र पदस्थापना होईपर्यंत शिक्षण आयुक्तालय, पुणे येथील मुख्यालयात नियुक्ती करण्यात आली आहे. त्यामुळे पवार यांना १७ ऑगस्ट रोजी दुपारनंतर गडचिरोली जिल्हा परिषदेच्या आस्थापनेवरून कार्यमुक्त करण्यात येणार आहे.
नव्या शिक्षणाधिकाऱ्यांच्या पदस्थापनेमुळे प्राथमिक शिक्षण विभागाच्या कामकाजाला नवी दिशा मिळण्याची अपेक्षा आहे. दुर्गम भागातील शाळांपर्यंत शिक्षणाच्या सुविधा पोहोचविणे, शिक्षकांचे प्रश्न मार्गी लावणे आणि शैक्षणिक गुणवत्ता सुधारण्याचे मोठे आव्हान उजगारे यांच्यासमोर राहणार आहे.
या संदर्भातील पदस्थापना व कार्यमुक्तीचे आदेश जिल्हा परिषदेचे मुख्य कार्यकारी अधिकारी सुहास गाडे यांनी जारी केले आहेत.
