गडचिरोली:भारत निवडणूक आयोगाच्या निर्देशानुसार गडचिरोली जिल्ह्यात ‘मतदार याद्यांचा विशेष सखोल पुनरीक्षण कार्यक्रम-२०२६’ प्रभावी, पारदर्शक आणि त्रुटीमुक्त पद्धतीने राबविण्यासाठी जिल्हा प्रशासन सज्ज झाले आहे. या अभियानाअंतर्गत ३० जून ते २९ जुलै या कालावधीत मतदान केंद्रस्तरीय अधिकारी (बीएलओ) प्रत्येक घराला भेट देऊन मतदारांची माहिती पडताळणार असून एन्ल्युमरेशन फॉर्म भरून घेणार आहेत. या प्रक्रियेत प्रत्येक पात्र नागरिकाने सक्रिय सहभाग नोंदवावा, असे आवाहन जिल्हाधिकारी अविश्यांत पंडा यांनी केले.
जिल्हाधिकारी कार्यालयात सोमवारी आयोजित बैठकीत सर्व प्रमुख राजकीय पक्षांच्या प्रतिनिधींना पुनरीक्षण कार्यक्रमाचा आराखडा, कार्यपद्धती आणि वेळापत्रकाची सविस्तर माहिती देण्यात आली. यावेळी उपजिल्हाधिकारी (निवडणूक) राहुल जाधव यांच्यासह विविध राजकीय पक्षांचे प्रतिनिधी उपस्थित होते.
भारत निवडणूक आयोगाने १ ऑक्टोबर २०२६ हा मतदार नोंदणीसाठी अर्हता दिनांक निश्चित केला असून, या तारखेपर्यंत १८ वर्षे पूर्ण करणाऱ्या सर्व पात्र युवक-युवतींना मतदार म्हणून नाव नोंदविण्याची संधी मिळणार आहे.
गडचिरोली जिल्ह्यातील आरमोरी, गडचिरोली आणि अहेरी या तीन विधानसभा मतदारसंघांतील ८ लाख २८ हजार ९०४ मतदारांच्या पडताळणीसाठी १६ लाख ५७ हजार ८०८ एन्ल्युमरेशन फॉर्म तयार करण्यात आले आहेत. बीएलओंकडून घरोघरी भेट देत माहिती संकलित केली जाणार असून ती बीएलओ ॲपद्वारे ऑनलाइन नोंदविण्यात येईल.जिल्ह्यात आतापर्यंत ९१.४८ टक्के मतदारांचे मॅपिंग पूर्ण झाले असून १ लाख ३९ हजार ८११ मतदारांच्या नोंदींमध्ये विविध त्रुटी आढळल्या आहेत. या त्रुटी दूर करून ५ ऑगस्ट २०२६ रोजी प्रारूप मतदार यादी प्रसिद्ध केली जाणार आहे. तसेच दुबार नावे व अन्य त्रुटी दूर करण्याची प्रक्रिया सुरू असल्याची माहिती प्रशासनाने दिली.
जिल्ह्यातील ९७२ मतदान केंद्रांसाठी २,७९६ बूथ लेव्हल एजंट (बीएलए) नियुक्त करण्यात आले असून त्यांनी बीएलओंना सहकार्य करून मतदार यादी अधिक अचूक आणि त्रुटीमुक्त करण्यासाठी पुढाकार घ्यावा, असेही जिल्हाधिकाऱ्यांनी स्पष्ट केले
