नसरापूर चिमुकली अत्याचार-हत्या प्रकरणाचा निकाल; भीमराव कांबळेला फाशी, ‘रिअरेस्ट ऑफ रेअर’ म्हणत न्यायालयाचा ऐतिहासिक निर्णय

पुणे | प्रतिनिधी :
संपूर्ण महाराष्ट्राला हादरवून सोडणाऱ्या पुणे जिल्ह्यातील नसरापूर येथील साडेतीन वर्षांच्या चिमुकलीवरील लैंगिक अत्याचार आणि निर्घृण हत्या प्रकरणात अखेर न्यायालयाने ऐतिहासिक निकाल दिला आहे. पुणे जिल्हा व सत्र न्यायालयातील विशेष फास्ट ट्रॅक न्यायालयाने रविवारी (२९ जून) आरोपी भीमराव कांबळे (वय ६५) याला फाशीची शिक्षा सुनावत हा गुन्हा ‘रिअरेस्ट ऑफ रेअर’ स्वरूपाचा असल्याचे स्पष्ट केले. विशेष न्यायाधीश एस. आर. साळुंखे यांनी सविस्तर निकालपत्र वाचताना आरोपीचे कृत्य अमानुष, क्रूर आणि समाजमनाला हादरवणारे असल्याचे नमूद केले.

न्यायालयाने आपल्या निर्णयात म्हटले की, पीडित बालिका अवघ्या साडेतीन वर्षांची होती. ती स्वतःचा बचाव करण्यास पूर्णपणे असमर्थ होती. अशा निष्पाप आणि असहाय्य बालिकेवर आरोपीने लैंगिक अत्याचार करून तिची निर्घृण हत्या केली. या गुन्ह्याची क्रूरता, त्यामागील विकृत मानसिकता आणि समाजावर झालेला परिणाम लक्षात घेता हा गुन्हा ‘रिअरेस्ट ऑफ रेअर’ श्रेणीत मोडत असल्याने मृत्युदंडाशिवाय अन्य कोणतीही शिक्षा न्याय्य ठरणार नाही, असे न्यायालयाने स्पष्ट केले.

सर्वोच्च न्यायालयाच्या निकषांचा आधार

सरकार पक्षाचे विशेष सरकारी वकील अजय मिसर यांनी अंतिम युक्तिवादादरम्यान सर्वोच्च न्यायालयाच्या १२ महत्त्वपूर्ण निर्णयांचा संदर्भ देत आरोपीस फाशीची शिक्षा देण्याची मागणी केली होती. या सर्व निर्णयांमध्ये अल्पवयीन मुलींवरील अत्याचार आणि हत्येच्या गंभीर गुन्ह्यांबाबत सर्वोच्च न्यायालयाने ठरवून दिलेले निकष या प्रकरणालाही लागू होत असल्याचे न्यायालयाने मान्य केले.

न्यायालयाने नमूद केले की, गुन्हा करताना आरोपीने दाखवलेली क्रूरता, पीडितेची असहाय्यता, समाजावर झालेला मानसिक परिणाम आणि आरोपीचा पूर्व इतिहास हे सर्व घटक मृत्युदंडासाठी महत्त्वाचे ठरतात.

वैज्ञानिक पुराव्यांनी गुन्हा सिद्ध

या खटल्यात पुणे ग्रामीण पोलिसांनी सादर केलेले सीसीटीव्ही फुटेज, डीएनए अहवाल, फॉरेन्सिक तपास, न्यायवैद्यकीय पुरावे, घटनास्थळावरील नमुने आणि साक्षीदारांचे जबाब या सर्व पुराव्यांची साखळी अखंड असल्याचे न्यायालयाने नमूद केले.

घटना घडली त्यावेळी आरोपी पीडितेसोबत असल्याचे सीसीटीव्हीमध्ये स्पष्ट दिसत होते. त्याबाबत आरोपी कोणतेही समाधानकारक स्पष्टीकरण देऊ शकला नाही. त्यामुळे आरोपीविरुद्धची परिस्थितीजन्य पुराव्यांची साखळी पूर्णपणे सिद्ध झाल्याचे न्यायालयाने निरीक्षण नोंदवले.

‘मुलीवर अमानुष अत्याचार; समाजाला धक्का‘

निकालपत्रात न्यायालयाने म्हटले की, आरोपीने चिमुकलीवर अत्यंत अमानुष पद्धतीने अत्याचार केले. वैद्यकीय पुराव्यांनुसार तिच्या शरीरावर अनेक गंभीर जखमा होत्या. तिच्यावर झालेल्या अत्याचारामुळे तिला प्रचंड वेदना सहन कराव्या लागल्या. अशा प्रकारचे कृत्य संपूर्ण समाजाला हादरवून टाकणारे असून, अशा गुन्ह्यांविरोधात न्यायालयाने कठोर संदेश देणे आवश्यक आहे.

न्यायालयाने असेही नमूद केले की, आरोपीमध्ये कोणताही पश्चात्ताप दिसून आला नाही. उलट त्याचा पूर्वीचाही गुन्हेगारी इतिहास गंभीर स्वरूपाचा आहे. यापूर्वीही अल्पवयीन मुलीवर अत्याचाराचा प्रयत्न, एका वृद्ध महिलेवर हल्ला तसेच अन्य एका महिलेवर अत्याचाराचा प्रयत्न केल्याच्या घटनांचा उल्लेख न्यायालयाने केला. त्यामुळे आरोपी सुधारण्याच्या पलीकडे गेला असल्याचे निरीक्षण न्यायालयाने नोंदवले.

‘समाजाच्या भावना समजतो; पण निर्णय कायद्यानेच‘

घटनेनंतर नसरापूरसह परिसरात तीव्र संताप व्यक्त झाला होता. नागरिकांनी महामार्ग रोखून आरोपीला कठोर शिक्षा देण्याची मागणी केली होती. याचा उल्लेख करत न्यायालयाने म्हटले की, समाजातील भावना समजण्यासारख्या आहेत; मात्र न्यायालयाला केवळ कायदा, पुरावे आणि संविधानाच्या चौकटीत राहूनच निर्णय द्यावा लागतो.

१६ दिवसांत आरोपपत्र; ५५ साक्षीदारांची साक्ष

या प्रकरणाचा तपास पुणे ग्रामीण पोलिसांनी युद्धपातळीवर केला. गुन्हा घडल्यानंतर अवघ्या १६ दिवसांत सुमारे १२०० पानी आरोपपत्र न्यायालयात दाखल करण्यात आले. खटल्यादरम्यान ५५ साक्षीदारांची साक्ष नोंदविण्यात आली. सीसीटीव्ही, डीएनए, वैद्यकीय पुरावे, फॉरेन्सिक अहवाल आणि तांत्रिक तपासामुळे आरोपीविरोधातील प्रत्येक दुवा सिद्ध करण्यात तपास यंत्रणांना यश आले.

तपास अधिकारी वरिष्ठ पोलिस निरीक्षक विजयमाला पवार, फॉरेन्सिक तज्ज्ञ, सायबर पथक, वैद्यकीय अधिकारी आणि विशेष सरकारी वकील यांच्या कामाचे न्यायालयाने विशेष कौतुक केले. अशा संवेदनशील गुन्ह्यांचा जलद तपास आणि वेळेत खटला पूर्ण करण्यासाठी सर्व यंत्रणांनी समन्वयाने काम केल्याचे न्यायालयाने नमूद केले.

कुटुंबीयांना अश्रू अनावर

निकाल जाहीर होताच न्यायालयात उपस्थित असलेल्या पीडित चिमुकलीच्या कुटुंबीयांना अश्रू अनावर झाले. अनेक महिन्यांच्या न्यायालयीन लढाईनंतर दोषीला कठोर शिक्षा झाल्याने त्यांनी समाधान व्यक्त केले. दुसरीकडे, शिक्षा सुनावल्यानंतर आरोपी भीमराव कांबळे कोणतीही प्रतिक्रिया न देता शांत उभा राहिला.

प्रकरणाचा घटनाक्रम

• १ मे २०२६ : नसरापूर येथून साडेतीन वर्षांची बालिका बेपत्ता; काही वेळातच तिचा मृतदेह आढळला.
• २ मे : सीसीटीव्ही व तांत्रिक पुराव्यांच्या आधारे आरोपी भीमराव कांबळेला अटक.
• १६ मे : सुमारे १२०० पानी आरोपपत्र विशेष न्यायालयात दाखल.
• २१ मेपासून : दैनंदिन सुनावणीला प्रारंभ.
• ५५ साक्षीदार, डीएनए, फॉरेन्सिक व वैद्यकीय पुरावे न्यायालयात सादर.
• २९ जून : विशेष न्यायालयाने आरोपीला बलात्कार, हत्या आणि पॉक्सो कायद्यांतर्गत दोषी ठरवत फाशीची शिक्षा सुनावली.

नसरापूर प्रकरणातील हा निकाल बालकांवरील लैंगिक अत्याचार आणि हत्यांसारख्या गंभीर गुन्ह्यांबाबत न्यायव्यवस्था कोणतीही तडजोड करणार नसल्याचा स्पष्ट संदेश देणारा ठरला आहे. या निर्णयामुळे पीडित कुटुंबाला न्याय मिळाल्याची भावना व्यक्त होत असतानाच अशा विकृत प्रवृत्तींवर कठोर कारवाईची गरज पुन्हा अधोरेखित झाली आहे.