गडचिरोली: जिल्हा जात प्रमाणपत्र पडताळणी समिती कार्यालयात लाचखोरीचा भ्रष्टाचार उघड झाला. लाचलुचपत प्रतिबंधक विभागाने (एसीबी) सापळा रचून दोन कंत्राटी कर्मचाऱ्यांना प्रत्येकी ५०० रुपये लाच स्वीकारताना रंगेहात अटक केली आहे. मंगेश आंबोरकर (४२) आणि दिनेश सिडाम (३८) हे दोन्ही लाचखोर कर्मचारी आहेत.
तक्रारदाराने आपल्या मुलीचे जात प्रमाणपत्र मिळवण्यासाठी ३१ मार्चला ऑनलाइन अर्ज सादर केला होता. १ एप्रिलला कार्यालयात गेल्यावर आंबोरकर याने मुदत संपल्याचे कारण सांगून ५ हजार रुपयांची लाच मागितली. २ एप्रिलला तक्रारीची पडताळणी केली असता सिडाम याने आंबोरकरच्या वतीने २ हजार रुपयांची मागणी केली. तडजोडीत दोघांनी प्रत्येकी १ हजार रुपये स्वीकारण्यास संमती दर्शवली. त्याच दिवशी कार्यालयात लाच घेताना दोघांना एसीबीने ताब्यात घेतले.
आंबोरकरच्या अंगझडतीत १ हजार रुपयांची लाच रक्कम आणि रेडमी १२ मोबाईल (१० हजार मूल्य) सापडला. सिडामकडून मोटो जी ४५ मोबाईल (१० हजार मूल्य) जप्त करण्यात आला. दोघांचीही घरझडती सुरू आहे. भ्रष्टाचार प्रतिबंधक कायद्याच्या कलम ७ व १२ अंतर्गत गडचिरोली पोलिस ठाण्यात गुन्हा दाखल करण्याची प्रक्रिया सुरू आहे.ही कारवाई एसीबीचे पोलिस उपाधीक्षक विक्रांत सगणे यांच्या मार्गदर्शनाखाली पोलिस निरीक्षक संतोष पाटील यांच्या नेतृत्वात पार पडली.
