अहेरी: येथील मस्जिद चौकात नुकताच सुरू झालेल्या गणेश सिनेमॅटिक स्टुडिओला आमदार डॉ. धर्मराव बाबा आत्राम यांनी भेट देऊन तरुण उद्योजक गणेश येलमुले यांच्या उत्तुंग यशाबद्दल अभिनंदन केले आणि पुढील प्रवासासाठी शुभेच्छा दिल्या.
स्वगाव तानबोडीतून छोट्या फोटोग्राफी व्यवसायाने सुरुवात केलेल्या गणेश येलमुले याने अल्पावधीतच फोटोग्राफी आणि व्हिडिओग्राफी क्षेत्रात खास ओळख निर्माण केली आहे. लग्न, साक्षात्कार, वाढदिवसांसह विविध कार्यक्रमांमध्ये त्याच्या कामाने धुमाकूळ घातला आहे. आता सोशल मीडियावर त्याच्या व्हिडिओ कंटेंटने तरुणांना आकर्षित करत लाखो व्ह्यूज मिळवले आहेत. या छोट्या सुरुवातीवरून त्याने स्वतःसोबत अनेक तरुणांना रोजगाराची संधी दिली असून, आता अहेरी मुख्यालयात स्वतःचा पूर्ण स्टुडिओ उभारला आहे.गणेश येलमुले यांची ही यशोगाथा ग्रामीण भागातील तरुणांसाठी प्रेरणादायी ठरत आहे.
नुकत्याच झालेल्या स्टुडिओच्या शुभारंभ प्रसंगी आ. आत्राम यांनी गणेश यांच्या मेहनतीचे कौतुक करत, “अशा तरुण उद्योजकांमुळेच स्थानिक अर्थव्यवस्थेला बळकटी मिळते,” असे सांगितले. यावेळी सिनेट सदस्य तनुश्री आत्राम, युवा नेते हर्षवर्धन बाबा आत्राम तसेच स्थानिक मान्यवर उपस्थित होते.
