गडचिरोली:रात्रीच्या सुमारास आलिशान वाहनातून सागवान तस्करी करताना वन विभागाने सापळा रचून तब्बल २ लाख ९२ हजार ५०० रुपयांचा मुद्देमाल जप्त केला.ही घटना मुलचेरा तालुक्यातील खुदिरामपल्ली येथे २१ जून रोजी उघडकीस आली.या घटनेत वन विभागाने दोन आरोपीना ताब्यात घेऊन न्यायालयात दाखल केले असता न्यायालयाने त्यांना २४ जुलै पर्यंत वन कोठडी सुनावली आहे.
प्राप्त माहितीनुसार जंगल परिसरातून मोठ्या प्रमाणात सागवान लठ्ठे तस्करी होणार असल्याची गोपनीय माहिती २० जुलै रोजी पेडीगुडम वनपरिक्षेत्र कार्यालयाला मिळाली.या माहितीच्या आधारे वरिष्ठांच्या मार्गदर्शनात पेडिगुडम वनपरिक्षेत्रातील सुंदरनगरचे वनरक्षक गणेश बोडा,मोहूर्लीचे वनरक्षक एम व्ही कोकणारे,चौकीदार असीम तालुकदार आणि दामोदर पेंदाम यांनी खुदिरामपल्लीच्या नाल्यावर रात्री १०.३० वाजताच्या दरम्यान मारुती सुजूकी एल एक्स झेन (एमएच ३८-२२३३) या वाहनाची तपासणी केली.
सदर आलिशान वाहनातून त्यांना ७ सागवान लठ्ठे तस्करी होत असल्याचे आढळले.लगेच वन विभागाच्या कर्मचाऱ्यांनी सदर वाहन आणि त्यातील वाहन चालक उत्तम शामल दास (३४) (वाहन चालक) आणि सोबत असलेले अरुण अधीर गाईन (३३) दोघेही राहणार खुदिरामपल्ली ता. मुलचेरा या दोन इसमांची विचारपूस केली असता त्यांनी येलचिल आणि वेलगुर जंगल परिसरातून सदर सागवान लठ्ठे आणत असल्याचे सांगितल्याची माहिती वनविभागाने दिली.
वन विभागाने मध्यरात्री १.४५ वाजेपर्यंत पंचनामा आणि जप्तीनामाची कारवाई केली.वन विभागाने दिलेल्या माहितीनुसार यात ७ सागवान लठ्ठे ज्याची किंमत ४२ हजार ५०० रुपये आणि चारचाकी वाहन ज्याची किंमत २ लाख ५० हजार रुपये असे वनविभागाने तब्बल २ लाख ९२ हजार ५०० रुपयांचा मुद्देमाल जप्त करत दोन आरोपींना ताब्यात घेतले.पेडिगुडमचे प्रभारी वनपरिक्षेत्राधिकारी एन एस वाडीघरे आणि त्यांच्या चमूने सदर दोन आरोपीना २१ जुलै रोजी चामोर्शी न्यायालयात हजर केले असता न्यायालयाने त्यांना २४ जुलै पर्यंत वन कोठडी सुनावली.
आलापल्ली वन विभागात चाललंय तरी काय
नुकतेच मागील जून महिन्यात आलापल्ली वन विभागातील याच पेडीगुडम वनपरिक्षेत्रातील गोमणी उपक्षेत्रात अवैध वृक्षतोड प्रकरण चांगलाच गाजला होता. येथील वनपाल एन टी सिडाम आणि वन रक्षक सचिन मस्के यांच्यावर वन विभागाने निलंबनाची कारवाई देखील केली होती. वन सुरक्षेबाबत गंभीर दिरंगाई, वरिष्ठांना चुकीची माहिती सादर करणे, आणि प्रशासकीय जबाबदाऱ्यांकडे दुर्लक्ष केल्याचा ठपका ठेवण्यात आला होता. सदर प्रकरण ताजे असतानाच आता मुलचेरा उपक्षेत्रातील सुंदरनगर बिटातील खुदिरामपल्ली येथे मोठी कारवाई करण्यात आल्याने या भागात मोठ्या प्रमाणात अवैध वृक्षतोड आणि सागवान लाकडांची तस्करी होत असल्याचे निष्पन्न झाले आहे.
विशेष म्हणजे मुलचेरा तालुक्यात मोठ्या प्रमाणात फर्निचर मार्टचे दुकान आहेत. त्यामुळे या भागात मोठ्या प्रमाणात अवैध सागवान तस्करीचा गोरख धंदा सुरू असल्याची चर्चा आहे. त्यामुळे पुढील तपासात आणखी बरेच माहिती समोर येण्याची शक्यता आहे.
