वरोरा │ होळी सणाच्या पार्श्वभूमीवर अवैध धंद्यांवर पोलिसांची नजर असून, वरोरा पोलिसांनी टेमुर्डा चौकात केलेल्या कारवाईत १ किलो ९९२ ग्रॅम गांजा जप्त करत आरोपीला अटक केली आहे.
दि. १३ मार्च २०२५ रोजी वरोरा पोलीस स्टेशनचे प्रभारी अधिकारी आणि डी.बी. पथक गस्तीवर असताना टेमुर्डा चौकात एक इसम हातात बॅग घेऊन संशयास्पदरीत्या उभा असल्याचे दिसून आले. पोलिसांनी त्याची झडती घेतली असता निळ्या-काळ्या रंगाच्या बॅगेत १ किलो ९९२ ग्रॅम गांजा सापडला.
अटक आरोपीचे नाव प्रफुल किशोर रामटेके (वय २९, रा. कॉलरी वार्ड, वरोरा) असे असून, त्याने आर्थिक फायद्यासाठी गांजाची विक्री करण्याच्या उद्देशाने हा साठा ठेवला होता. याप्रकरणी गुंगीकारक औषध व मनोव्यापारावर परिणाम करणारे पदार्थ अधिनियम (N.D.P.S. Act 1985) अंतर्गत कलम ८ (क), २० (ब) ii (ब) नुसार गुन्हा दाखल करण्यात आला आहे.
ही कारवाई पोलीस अधीक्षक, चंद्रपूर, अप्पर पोलीस अधीक्षक, चंद्रपूर तसेच सहायक पोलीस अधीक्षक व पोलीस उपविभागीय अधिकारी नयोमी साटम यांच्या मार्गदर्शनाखाली करण्यात आली.
या मोहिमेत वरोरा पोलीस ठाण्याचे ठाणेदार अजिंक्य तांबडे, सपोनि शरद भस्मे, पोउपनि दिपक ठाकरे, पो.अं. संदीप मुळे, पो.अं. विशाल राजुरकर, पोहवा मोहन निषाद, दिलीप सुर, अमोल नवघरे, मनोज ठाकरे आणि महेश गावतुरे यांनी सहभाग घेतला.
वरोरा पोलिसांच्या या कारवाईमुळे परिसरात अवैध ड्रग्ज तस्करीवर मोठा आळा बसणार असल्याचे मानले जात आहे.
