राज्य राखीव पोलीस दलाचा वर्धापन दिन सुरजागड येथे साजरा

गडचिरोली :- – राज्य राखीव पोलीस दलाचा वर्धापन दिन सोहळा पोलीस मदत केंद्र सुरजागड येथे उत्साहात साजरा करण्यात आला. राज्य राखीव पोलीस बल गट क्रमांक 4, नागपूरच्या समादेशक डॉ. प्रियंका नारनवरे (आयपीएस) यांच्या मार्गदर्शनाखाली विविध कार्यक्रमांचे आयोजन करण्यात आले.

या वर्धापन दिनानिमित्त हेडरी येथील विनोबा प्राथमिक व माध्यमिक आश्रमशाळेतील विद्यार्थ्यांना शालेय साहित्य वाटप करण्यात आले. तसेच वृक्षारोपण, ग्रामस्वच्छता अभियान, क्रिकेट व व्हॉलीबॉल स्पर्धांचे आयोजन करण्यात आले.

कार्यक्रमास हेडरी येथील उपविभागीय पोलीस अधिकारी योगेश रांजणकर, पोलीस मदत केंद्र, सुरजागडचे प्रभारी अधिकारी विठ्ठल सूर्यवंशी, पोलीस उपनिरीक्षक नारायण सानप व ज्योती शिंदे, राज्य राखीव पोलीस बल गट क्रमांक 4, डी कंपनीचे प्लाटून कमांडर राजेश सोनेकर, सहायक फौजदार कोडवते व वलके, हवालदार राजेश दैवलकर, मिलिंद वडपल्लीवार, एस. पी. ऊईके, आर. एस. पवार, विरेंद्र सौंदरकर, ए. एल. लिल्हारे, डी. आर. नंदागवळी, एन. ए. विजयकर यांच्यासह अनेक पोलीस अधिकारी आणि कर्मचारी उपस्थित होते.

राज्य राखीव पोलीस दलाच्या वर्धापन दिनानिमित्त राबवलेल्या सामाजिक उपक्रमांचे सर्वत्र कौतुक होत आहे.