गडचिरोली:-कोणताही मतदार मतदानापासून वंचित राहू नये, या उद्देशाने भारत निवडणूक आयोगाने यावर्षी प्रथमच ८५ वर्षांवरील मतदार आणि ४० टक्क्यांपेक्षा जास्त दिव्यांगाचे प्रमाणपत्र असलेल्या मतदारांसाठी गृह मतदानाची सोय उपलब्ध करून दिली आहे. त्या अनुषंगाने गडचिरोली-चिमूर लोकसभा मतदारसंघात जिल्हा निवडणूक अधिकारी तथा जिल्हाधिकारी संजय दैने यांच्या मार्गदर्शनात १० ते ११ एप्रिल या कालावधीत गृह मतदानाची प्रक्रिया राबविण्यात येत आहे.सिरोंचा येथील शंभरी गाठलेल्या किष्टय्या आशालू मादरबोईना (१००) या मतदाराने आपलं पहिलं मत नोंदविले.
गडचिरोली-चिमूर लोकसभा क्षेत्रात एकूण ६ विधानसभा क्षेत्रांचा समावेश असून अतिदुर्गम व नक्षलग्रस्त अहेरी विधानसभा क्षेत्रातील ४० टक्क्यांपेक्षा जास्त दिव्यांगाचे प्रमाणपत्र असलेले आणि ८५ वर्षावरील मतदार असे एकूण ३६ मतदारांनी गृह मतदानाची इच्छा व्यक्त केली. त्यानुसार प्रशासनाने त्यांच्याकडून नमुना १२-डी भरून घेतला होता.सहाय्यक जिल्हाधिकारी तथा उपविभागीय अधिकारी आदित्य जिवने यांच्या नेतृत्वात मुलचेरा,एटापल्ली,अहेरी आणि सिरोंचा या चार तालुक्यात गृह मतदान घेण्यासाठी मतदान पथकांना रवाना करण्यात आले होते.विशेष म्हणचे महाराष्ट्र, छत्तीसगड आणि तेलंगाणा असे तीन राज्यांची सीमा असलेल्या सिरोंचा मुख्यालयात वयाच्या शंभरी गाठलेल्या किष्टय्या आशालू मादरबोईना यांनी आपलं हे पहिलं मत नोंदविले.त्यांच्या सोबत किष्टय्या लसमय्या कोमेरा (८६) या वयोवृद्धाने देखील मतदान केले.
गृह मतदान टीमने तब्बल १०७ किलोमीटर प्रवास करत सिरोंचा गाठले व गृह मतदानाची संपूर्ण प्रक्रिया समजावून सांगितल्यानंतर या दोघांनी अमुल्य मत नोंदविले.दोघेही वयोवृद्ध एका ठिकाणाहून दुसऱ्या ठिकाणी जाऊ शकत नाही त्यामुळे त्यांनी आपले मत घरातच स्थापन केलेल्या मतदान कक्षात बसूनच नोंदविले आणि मतपत्रिका लिफाफ्यामध्ये टाकून अधिका-यांकडे सुपूर्द केली.तर किष्टय्या लसमय्या कोमेरा (८६) यांनी सुद्धा आपला मतदानाचा हक्क बजावला.यात गडचिरोली-चिमूर क्षेत्रात अहेरी विधानसभा क्षेत्रातील राज्याच्या शेवटच्या टोकावरील सिरोंचा चे किष्टय्या आशालू मादरबोईना हे शंभरी ओलांडलेल्या मतदाराने पहिलं हक्क बजावला हे विशेष.
१० एप्रिल रोजी चार तालुक्यात गृह मतदान पथकांद्वारे मतदान प्रक्रिया राबविण्यात आली.सिरोंचा येथील गृह मतदान पथकात नायब तहसीलदार जनक काडबाजीवार,क्षेत्रीय अधिकारी सागर भरसट,केंद्राध्यक्ष प्रमोद करपते, सहाय्यक मतदान अधिकारी सुरज आत्राम,पोलीस शिपाई प्रशांत मिसरी,प्रमोद तोटापल्लीवार आदी उपस्थित होते.
