गडचिरोली: शैक्षणिक क्षेत्रात उत्कृष्ट काम करण्यासोबत विविध उपक्रम राबवून सामाजिक योगदान देणाऱ्या शिक्षकांना राज्य शासनाच्या वतीने दरवर्षी क्रांतिज्योती सावित्रीबाई फुले शिक्षक गुणगौरव या राज्यस्तरीय पुरस्काराने सन्मानित केले जाते. यावर्षी त्यासाठी गडचिरोली जिल्ह्यातील चार शिक्षकांची निवड झाली आहे.आज ५ सप्टेंबर रोजी शिक्षक दिनी मुंबईत या शिक्षकांना क्रांतिज्योती सावित्रीबाई फुले पुरस्काराने गौरविण्यात येणार आहे.
निवड झालेल्या शिक्षकांमध्ये अहेरी येथील धर्मराव शिक्षण मंडळाअंतर्गत धर्मराव कृषी विद्यालय तथा कनिष्ठ महाविद्यालय अहेरीच्या सहाय्यक शिक्षिका जयश्री खोंडे, मुलचेरा पंचायत समिती अंतर्गत गणेशनगर येथील जि.प.प्राथमिक शाळेचे सहा.शिक्षक सुजय जगदीश बाच्छाड, मोहुर्ली येथील जि.प.प्राथमिक शाळेचे शिक्षक अशोक धाडुजी बोरकुटे तर कोरची तालुक्यातील जैतानपार जि.प.प्राथमिक शाळेचे दिलीप रावजी नाकाडे यांचा समावेश आहे.
या आधी जयश्री खोंडे यांच्या कार्याची दखल घेऊन त्यांना विविध सामाजिक संस्थांनी विविध पुरस्कारांनी सन्मानित केले आहे. याशिवाय त्यांनी अनेक राष्ट्रीय-आंतरराष्ट्रीय परिषदांमध्ये सहभाग घेतला आहे. मराठी विज्ञान परिषद, अंधश्रद्धा निर्मूलन समिती, कृषी संशोधन, सांस्कृतिक कार्यक्रम, महिला सबलीकरण, पर्यावरणपुरक जनजागृतीचे कार्य त्या अविरतपणे करत आहेत.तर इतर शिक्षकांचाही शिक्षण क्षेत्रासोबतच विविध क्षेत्रात मोलाचा वाटा आहे.
५ सप्टेंबर रोजी म्हणजे आज दुपारी ४ वाजता टाटा थिएटर,नॅशनल सेंटर फॉर परफॉर्मिंग आर्ट्स,(एन.सी.पी.ए) नरिमन पॉईंट मुंबई येथे क्रांतीज्योती सावित्रीबाई फुले राज्यशिक्षक गुणगौरव पुरस्कार प्रदान समारंभ पार पडणार आहे. यात गडचिरोली जिल्ह्यातील या ४ शिक्षकांचा गौरव केला जाणार आहे.या शिक्षक गुणगौरव पुरस्कार प्रदान समारंभात राज्याचे मुख्यमंत्री एकनाथ शिंदे,उपमुख्यमंत्री देवेंद्र फडणवीस, उपमुख्यमंत्री अजित पवार, विधानसभा अध्यक्ष ऍड.राहुल नार्वेकर, शालेय शिक्षण मंत्री दीपक केसरकर कौशल्य विकास मंत्री मंगल प्रभात लोढा आदी मान्यवर उपस्थित राहणार आहेत.
