वरोरा : दिवाळीचा सण म्हटला की शहरात विविध मनोरंजनात्मक कार्यक्रम आणि मेलांची रेलचेल सुरू होते. दरवर्षीप्रमाणे यंदाही वरोरा आणि भद्रावती शहरात दिवाळीनिमित्त मेळ्यांचे आयोजन करण्यात आले. वरोरा येथे कल्पतरू सार्वजनिक संस्था, तर भद्रावती येथे रोटरी क्लबच्या वतीने मेळा भरविण्यात आला. मात्र, या मेळ्यांसाठी पुन्हा एकदा तालुका क्रीडा संकुलाच्या मैदानाची निवड करण्यात आल्याने क्रीडाप्रेमी आणि नागरिकांमध्ये नाराजी व्यक्त होत आहे.
विशेष म्हणजे, मागील वर्षी खेळाडूंच्या नियमित सरावाचा विचार करून दोन्ही शहरांतील मेळ्यांना क्रीडा संकुलाची जागा नाकारण्यात आली होती. मग यंदा अचानक असा कोणता बदल झाला की, त्याच मैदानावर मेळे भरविण्यास परवानगी देण्यात आली? शहरात इतरत्र जागा उपलब्ध असताना क्रीडा संकुलाचाच आग्रह कशासाठी, असा प्रश्न उपस्थित होत आहे.
क्रीडा संकुल हे खेळाडूंच्या सरावासाठी, स्पर्धांसाठी आणि नवोदित खेळाडूंना संधी मिळण्यासाठी निर्माण करण्यात आलेले असते. मात्र, याच मैदानावर व्यावसायिक स्वरूपाचे मेळे भरविले जात असतील, तर नियमित सराव करणाऱ्या खेळाडूंनी जायचे कुठे? मेळ्यांमध्ये प्रवेशासाठी शुल्क आकारले जाते. त्यामुळे आयोजकांना आर्थिक उत्पन्न मिळत असताना खेळाडूंच्या सरावाचा आणि मैदानाच्या मूळ उद्देशाचा बळी का दिला जात आहे, हा महत्त्वाचा प्रश्न आहे.
दोन्ही शहरांमध्ये क्रीडाप्रेमींनी मेळ्यांच्या परवानगीवर आक्षेप नोंदविला. वरोरा येथे शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेच्या वतीने आंदोलनही करण्यात आले. या आंदोलनानंतर भविष्यात क्रीडा संकुलावर बिगर क्रीडा कार्यक्रमांना परवानगी दिली जाणार नाही, असा ठराव करण्याची भूमिका समोर आली. मात्र, यंदाचा मेळा त्याच मैदानावर भरविण्यात आला. मग भविष्यातील ठराव करून वर्तमानातील प्रश्न सुटणार आहे का? यंदा खेळाडूंच्या सरावात झालेल्या व्यत्ययाची जबाबदारी कोण घेणार?
मेळ्यांच्या प्रवेशद्वारावर झळकणारे राजकीय नेत्यांचे मोठमोठे फलक पाहता या आयोजनामागील राजकीय पाठबळाचीही चर्चा नागरिकांमध्ये सुरू आहे. प्रशासनाने निर्णय घेताना खेळाडूंच्या हिताला प्राधान्य दिले की राजकीय दबावाला, याचे स्पष्टीकरण देणे आवश्यक आहे. क्रीडा विभागाने परवानगी देताना खेळाडूंची मते जाणून घेतली होती का? तसेच क्रीडा संकुलाचा व्यावसायिक वापर करण्यामागे कोणते आर्थिक हितसंबंध आहेत का, याचीही निष्पक्ष चौकशी होणे गरजेचे आहे.
खेळाडूंसाठी उभारलेल्या मैदानावर मेळे भरविण्याचा हा प्रकार म्हणजे क्रीडा संकुलाच्या मूळ उद्देशालाच हरताळ फासण्यासारखा आहे. आयोजकांचा कार्यक्रम, राजकीय प्रतिष्ठा आणि प्रशासनाची परवानगी यापेक्षा खेळाडूंचे भविष्य महत्त्वाचे नाही का? वरोरा आणि भद्रावतीतील नागरिक आज हाच सवाल विचारत आहेत.
क्रीडा संकुल खेळाडूंसाठी आहे की मेळ्यांच्या माध्यमातून कमाई करण्यासाठी? क्रीडा विभागाने या प्रश्नाचे उत्तर देण्याची वेळ आता आली आहे.
