मूल तालुक्यातील चिचाळा येथे जंगलात गुरे राखण्यासाठी गेलेल्या गुराख्यावर वाघाने हल्ला केल्याची घटना घडली. या हल्ल्यात मारोती उद्धव कोठारे (वय ५०) गंभीर जखमी झाले. त्यांच्यावर मूल उपजिल्हा रुग्णालयात प्राथमिक उपचार केल्यानंतर पुढील उपचारांसाठी चंद्रपूर जिल्हा रुग्णालयात हलविण्यात आले. दरम्यान, वाघाचा तातडीने बंदोबस्त करावा आणि जखमी गुराख्याला जास्तीत जास्त आर्थिक मदत द्यावी, अशी मागणी शिवसेनेचे माजी तालुका प्रमुख तथा चिचाळा ग्रामपंचायतीचे माजी सदस्य प्रशांत गट्टुवार यांनी वनविभागाकडे केली आहे.
मिळालेल्या माहितीनुसार, मारोती कोठारे हे गुरे राखण्यासाठी जंगलात गेले असताना दुपारी सुमारे दोन वाजण्याच्या सुमारास दबा धरून बसलेल्या वाघाने त्यांच्यावर अचानक हल्ला केला. वाघ आणि गुराखी यांच्यात झटापट सुरू असताना सोबत असलेल्या अन्य गुराख्यांनी घटनास्थळी धाव घेत आरडाओरड केली. त्यामुळे वाघाने तेथून पळ काढला. मात्र, या हल्ल्यात कोठारे गंभीर जखमी झाले.
घटनेनंतर जखमी कोठारे यांना मूल उपजिल्हा रुग्णालयात दाखल करण्यात आले. प्राथमिक उपचारांनंतर वनविभागाच्या वाहनातून त्यांना पुढील उपचारांसाठी चंद्रपूर जिल्हा रुग्णालयात नेण्यात आले.
यावेळी उपस्थित वनविभागाच्या अधिकाऱ्यांसमक्ष प्रशांत गट्टुवार यांनी चिचापल्ली वनपरिक्षेत्र अधिकाऱ्यांशी संपर्क साधून वाघाचा तातडीने बंदोबस्त करण्याची मागणी केली. परिसरात अशा घटना पुन्हा घडू नयेत, यासाठी वनविभागाने आवश्यक उपाययोजना कराव्यात, तसेच जखमी कोठारे यांची आर्थिक परिस्थिती अत्यंत हलाखीची असल्याने त्यांना जास्तीत जास्त आर्थिक मदत द्यावी, अशी मागणीही त्यांनी केली.
