मोठी मुलगी अकरावीत, धाकटी सातवीत; वरोऱ्याला जाते सांगून घराबाहेर पडलेल्या सुधा पंधरे यांचा अद्याप शोध नाही
वणी | प्रतिनिधी
आई, आम्हाला तुझ्याशिवाय राहता येत नाही… तू कुठेही असशील, पण घरी परत ये! या आर्त हाकांनी दोन मुलींचे घर आईच्या प्रतीक्षेत व्याकूळ झाले आहे. वणी येथील सुधा गंगाधर पंधरे या २६ सप्टेंबरपासून बेपत्ता असल्याने त्यांच्या कुटुंबावर दुःखाचा डोंगर कोसळला आहे. दहा दिवस उलटूनही आईचा शोध न लागल्याने अंजली आणि अमिषा या दोन्ही मुलींची घालमेल वाढली आहे. मुलींची ही अवस्था पाहून वडील गंगाधर पंधरे पत्नीच्या शोधासाठी वरोरा शहरात भटकंती करीत आहेत.
गंगाधर पंधरे हे रिक्षा चालवून आपल्या कुटुंबाचा उदरनिर्वाह करतात. त्यांची मोठी मुलगी अंजली अकराव्या वर्गात, तर धाकटी मुलगी अमिषा सातव्या वर्गात शिक्षण घेत आहे. २६ सप्टेंबर रोजी सकाळी सुधा यांनी अमिषाला आपण वरोरा येथे जात असून लवकरच परत येऊ, असे सांगितले आणि त्या घरातून निघून गेल्या. मात्र, दिवसभर उलटूनही त्या घरी परतल्या नाहीत. आईची वाट पाहून थकलेल्या मुलींनी तिचा शोध घेण्याचा प्रयत्न केला. सायंकाळी गंगाधर घरी परतल्यानंतर मुलींनी आई घरी आली नसल्याचे सांगत रडायला सुरुवात केली. त्यानंतर गंगाधर यांनीही पत्नीचा शोध घेण्यासाठी धावपळ सुरू केली. सर्वत्र शोध घेऊनही पत्नीचा ठावठिकाणा न लागल्याने अखेर त्यांनी वणी पोलीस ठाण्यात बेपत्ता झाल्याची तक्रार दाखल केली.
दिवसामागून दिवस जात आहेत; मात्र आई परतलेली नाही. आईच्या आठवणीने व्याकूळ झालेल्या अमिषाची मला माझी आई पाहिजे, ही आर्त हाक काळीज पिळवटून टाकणारी आहे. मुलींच्या डोळ्यांतील अश्रू आणि पत्नीच्या शोधात भटकणाऱ्या गंगाधर यांची अवस्था मन हेलावून टाकणारी आहे.सुधा पंधरे यांचा शोध घेण्यासाठी कुटुंबीयांकडून प्रयत्न सुरू आहेत. मात्र, अद्याप त्यांचा ठावठिकाणा लागलेला नाही. सुधा पंधरे यांच्याबाबत कोणालाही काही माहिती मिळाल्यास त्यांनी वणी पोलीस ठाण्याशी संपर्क साधून माहिती द्यावी, असे आवाहन करण्यात आले आहे.
आईच्या परतीच्या आशेवर दोन मुलींचे डोळे आजही दाराकडे लागले आहेत. त्यांच्या ओठांवर एकच विनवणी आहे आई, तू कुठेही असशील, सुखरूप असशील, तर घरी परत ये… आम्ही तुझी वाट पाहत आहोत!
