३० कुपोषित बालकांच्या संगोपनाची पंचायत समिती प्रशासनाने घेतली जबाबदारी

मारेगाव : (महेश खंगार) :- ‘सेवा संकल्प अभियान’ अंतर्गत मारेगाव तालुक्यात कुपोषण निर्मूलनासाठी पंचायत समिती प्रशासनाने महत्त्वपूर्ण पुढाकार घेतला आहे. तालुक्यातील ३० कुपोषित बालकांना पंचायत समितीतील अधिकारी व कर्मचाऱ्यांनी दत्तक घेत त्यांचे आरोग्य, पोषण आणि सर्वांगीण विकासासाठी विशेष प्रयत्न सुरू केले आहेत.
१७ सप्टेंबर ते १७ ऑक्टोबर या कालावधीत राबविण्यात येत असलेल्या सेवा संकल्प अभियानात कुपोषित बालकांच्या आरोग्याकडे विशेष लक्ष केंद्रित करण्यात आले आहे. पंचायत समिती कार्यालयातील अधिकारी तालुक्यातील प्रत्येकी एका कुपोषित बालकाची जबाबदारी स्वीकारून त्यांच्या कुटुंबीयांशी प्रत्यक्ष संपर्क साधत आहेत.
अधिकाऱ्यांकडून बालकांच्या घरी नियमित भेटी देऊन पोषण आहार, खानपानाच्या योग्य सवयी, स्वच्छता तसेच बालकांच्या आरोग्याची काळजी याबाबत पालकांना मार्गदर्शन केले जात आहे. कुपोषण दूर करण्यासाठी आवश्यक सहकार्यही केले जात आहे.
या उपक्रमासाठी तालुका आरोग्य अधिकारी, वैद्यकीय अधिकारी तसेच आरोग्य विभागाचे मार्गदर्शन व सहकार्य घेतले जात आहे. अधिकारी आठवड्यातून किमान दोन ते तीन दिवस संबंधित बालकांच्या घरी भेट देत असून, या भेटींमध्ये ग्रामपंचायत अधिकारी, अंगणवाडी सेविका, आशा सेविका आणि ग्रामपंचायत पदाधिकाऱ्यांचाही सहभाग आहे.
दरम्यान, तालुक्यातील सर्व ३० कुपोषित बालकांची विशेष आरोग्य तपासणी करण्यासाठी आरोग्य शिबिराचे आयोजन करण्यात येणार आहे. बालकांच्या आरोग्यात होणाऱ्या सुधारणा, पोषण स्थितीतील बदल आणि अभियानादरम्यान राबविण्यात आलेल्या विविध उपक्रमांचा नियमित आढावा घेतला जाणार आहे.
सेवा संकल्प अभियानाच्या कालावधीत तालुक्यातील सर्व कुपोषित बालकांना कुपोषणमुक्त करण्याच्या उद्देशाने पंचायत समिती प्रशासन, आरोग्य विभाग, ग्रामपंचायत आणि महिला व बालविकास विभागाच्या समन्वयातून प्रयत्न सुरू आहेत. या उपक्रमाची वरिष्ठ पातळीवरही दखल घेतली जाणार असल्याने मारेगाव तालुक्यातील कुपोषण निर्मूलनाच्या या सामूहिक प्रयत्नांना विशेष महत्त्व प्राप्त झाले आहे.
बॉक्स……………
मारेगाव तालुक्यात तीस बालके कुपोषित असुन त्यांच्या संगोपणाची परिपूर्ण जबाबदारी पंचायत समिती प्रशासनाने घेतली आहे. आरोग्य शिबीर आयोजित केले जाणार असुन त्यांच्या प्रकृतीत किती सुधारणा झाली हे तपासले जाणार असुन योग्य औषध उपचारास मदत मिळणार आहे.
भिमराव व्हंनखंडे
गटविकास अधिकारी पंचायत समिती मारेगाव