अहेरी : एकात्मिक आदिवासी विकास प्रकल्प, अहेरीच्या वतीने आदिवासी बंधू-बघीनी,शेतकरी, विद्यार्थी आणि महिलांच्या दैनंदिन समस्या जलदगतीने सोडविण्यासाठी ‘सेवा संकल्प अभियान’ सुरू करण्यात आले आहे. या अभियानाचा शुभारंभ गुरुवारी १७ सप्टेंबर रोजी एकलव्य मॉडेल रेसिडेन्शियल स्कूल, अहेरी येथे करण्यात आला.
सहाय्यक जिल्हाधिकारी तथा प्रकल्प अधिकारी शिवांश सिंग (भा.प्र.से.) यांच्या प्रमुख उपस्थितीत झालेल्या या कार्यक्रमात विविध उपक्रमांचे आयोजन करण्यात आले. यावेळी शाळेतील विद्यार्थ्यांचे मार्गदर्शन करण्यात आले, तसेच आरोग्य तपासणी शिबिराचेही उद्घाटन करण्यात आले.अभियानाच्या माध्यमातून आदिवासी समाजाच्या विविध समस्या, शासकीय योजना, प्रलंबित तक्रारी तसेच सामूहिक वन हक्क दावे याबाबत प्रशासनाकडून मार्गदर्शन व आवश्यक कार्यवाही केली जाणार आहे. नागरिकांनी आपल्या समस्या आणि तक्रारी प्रशासनापर्यंत पोहोचवाव्यात, यासाठी हे अभियान महत्त्वाचे माध्यम ठरणार आहे.
प्रशासन अधिक लोकाभिमुख आणि गतिमान करण्यासोबतच नागरिकांच्या दैनंदिन समस्या तातडीने सोडविण्यावर या अभियानाचा भर आहे. नागरिकांनी आपल्या समस्या व तक्रारी प्रशासनाकडे मांडाव्यात. प्राप्त तक्रारींचे तत्परतेने निराकरण करण्यासाठी संबंधित विभागांशी समन्वय साधला जाईल,असे प्रकल्प अधिकारी शिवांश सिंग यांनी सांगितले.
विशेष म्हणजे, हे अभियान केवळ एका दिवसापुरते मर्यादित नसून १७ ऑक्टोबर २०२६ पर्यंत महिनाभर राबविण्यात येणार आहे. त्यामुळे अहेरी प्रकल्पातील आदिवासी जनता, शेतकरी, महिला आणि विद्यार्थ्यांच्या समस्या प्रशासनापर्यंत पोहोचवून त्यावर कार्यवाही करण्याची संधी उपलब्ध झाली आहे.
