अहेरी : सामाजिक प्रबोधन, शैक्षणिक जागृती आणि विद्यार्थ्यांमध्ये सामाजिक प्रश्नांविषयी चिकित्सक विचार निर्माण करण्याच्या उद्देशाने डॉ. किशोर नैताम फाऊंडेशनतर्फे डॉ. किशोर नैताम यांची ५० वी जयंती विविध उपक्रमांनी उत्साहात साजरी करण्यात आली. यावेळी वक्तृत्व स्पर्धा, मॉक पार्लमेंट, विशेष सत्कार तसेच फाऊंडेशनच्या संकेतस्थळाचे लोकार्पण करण्यात आले.
कार्यक्रमाच्या अध्यक्षस्थानी राणी दुर्गावती विद्यालयाचे मुख्याध्यापक गजानन लोनबोले होते. सहाय्यक वनसंरक्षक दिपक रामटेके यांच्या हस्ते उद्घाटन झाले. यावेळी डॉ. इंदुमती खंडारे, सुषमा भोयर, प्रा. विष्णू सोनोने, प्रा. नीरज खोब्रागडे, जमुनाबाई नैताम आणि फाऊंडेशनचे अध्यक्ष रावजी नैताम यांची प्रमुख उपस्थिती होती.
फाऊंडेशनच्या सचिव डॉ. सुमती किशोर नैताम यांनी संस्थेच्या उद्दिष्टांची व आगामी उपक्रमांची माहिती दिली. रावजी नैताम, जमुनाबाई नैताम आणि डॉ. इंदुमती खंडारे यांच्या हस्ते drkishornaitamfoundation.in या संकेतस्थळाचे लोकार्पण करण्यात आले.वक्तृत्व स्पर्धेत २२ विद्यार्थ्यांनी सहभाग घेतला. यात खेमा भीमराव जूनघरे प्रथम, नैतिक बंडू चार्लावार द्वितीय आणि माहेक शेख तृतीय ठरले. तर मॉक पार्लमेंटमध्ये तब्बल ७२ विद्यार्थ्यांनी सहभाग घेतला. यात नजमीन आरिफ खान प्रथम, कैलास शिंगणे द्वितीय आणि शोन किशोर नैताम तृतीय ठरले. सहभागी विद्यार्थ्यांना पुस्तक भेट देण्यात आली.
यावेळी सामाजिक व शैक्षणिक क्षेत्रात उल्लेखनीय कार्याबद्दल डॉ. गणेश लाडासकर, सौ. शैला गोरेकर आणि कु. नमिता मडावी यांचा शाल, पुस्तक व सन्मानचिन्ह देऊन गौरव करण्यात आला. कार्यक्रमात डॉ. किशोर नैताम यांच्या मित्रपरिवाराने गीतगायनातून त्यांच्या आठवणींना उजाळा दिला. अखेरीस पारितोषिक वितरण, केक कापणे आणि सामूहिक भोजनाने कार्यक्रमाचा समारोप झाला.
विद्यार्थ्यांना विचार मांडण्याची संधी, सामाजिक प्रश्नांवर चर्चा आणि वाचनाची प्रेरणा देणारा हा उपक्रम उत्साहपूर्ण वातावरणात संपन्न झाला.
