प्रधानमंत्री आवास योजना (शहरी) 2.0 अंतर्गत भामरागड शहरात पहिल्या टप्प्यातील 56 पात्र लाभार्थ्यांना घरकुल बांधकाम प्रारंभ आदेश

भामरागड :- भामरागड नगर पंचायत क्षेत्रातील 8 गावातील गरजू कुटुंबियांना  प्रथमच प्रधानमंत्री आवास योजने अंतर्गत हक्काचे घर मिळणार आहे.केंद्र शासनाच्या प्रधानमंत्री आवास योजना (शहरी) 2.0 अंतर्गत नगरपंचायत भामरागड हद्दितील पात्र लाभार्थ्यांना घरकुलाचा लाभ देण्याच्या प्रक्रियेला वेग आला असून पहिल्या टप्प्यातील 56 पात्र लाभार्थ्यांना घरकुल बांधकामाचा प्रारंभ आदेश देण्यात आला आहे. योजनेअंतर्गत लाभार्थ्यांकडून ऑनलाईन अर्ज मागविण्यात आले होते.प्राप्त अर्जाची छाननी करुन पात्र ठरलेल्या 56 लाभार्थ्यांचे DPR तयार करण्यात आले. त्यानंतर हा प्रस्ताव गृह निर्माण शहरी विकास मंत्रालय भारत सरकार यांच्याकडे मंजूरीसाठी सादर करण्यात आला होता.सदर प्रस्तावास 23 फेब्रुवारी 2026 रोजी मंत्रालयाकडून मंजूरी प्राप्त झाली.मंजूरी नंतर पात्र लाभार्थ्यांकडून आवश्यक कागदपत्रांची पूर्तता करुन दिनांक 15 जुलै 2026 रोजी घरकुल बांधकामाचा प्रारंभ आदेश प्रदान करण्यात आला.यावेळी नगरपंचायत भामरागडचे तेजस्विनी मडावी बांधकाम सभापती व कविता येतमवार आरोग्य व स्वच्छता सभापती यांच्या हस्ते लाभार्थ्यांना बांधकाम प्रारंभ आदेशांचे वितरण करण्यात आले.या प्रसंगी नगरपंचायत प्रशासनाने शहरातील गरजू व पात्र नागरीकांनी प्रधानमंत्री आवास योजना (शहरी) 2.0 चा लाभ घेण्यासाठी आवश्यक कागदपत्रांसह ऑनलाईन अर्ज सादर करण्याचे आवाहन केले. ही योजना आर्थिकदृष्टया दुर्बल व गरजू कुटूंबांना सुरक्षित व पक्के घर उपलब्ध करुन देण्यासाठी महत्त्वपूर्ण ठरत असल्याचे सांगण्यात आले आहे.याबाबतची माहिती नगराध्यक्षा श्रीमती रामबाई कोमटी महाका तसेच मुख्याधिकारी अभिजीत सोनवणे यांनी दिली असून पात्र लाभार्थ्यांनी योजनेचा जास्तीत जास्त लाभ घ्यावा असे आवाहन करण्यात आले.