गडचिरोली: भामरागडकडे जाणाऱ्या दुचाकीला एका ट्रॅक्टरने जोरदार धडक दिल्याने पतिपत्नी ठार तर नात्यातील तरुण गंभीर जखमी झाल्याची घटना ७ मे रोजी सायंकाळच्या सुमारास आलापल्ली-भामरागड राष्ट्रीय महामार्गावर घडली. कुम्मा महारु पुंगाटी (५६) व मिडको कुम्मा पुंगाटी (४८) (रा. महाकापाडी, ता. भामरागड) हे पती-पत्नी अपघातात मृत्यू पावले, तर आशिष चंदू महाका (१७) (रा. परायनार, ता. भामरागड) गंभीर असून चंद्रपूर रुग्णालयात उपचार सुरू आहेत.
प्राप्त माहितीनुसार, कुमा व मिडको हे पती-पत्नी गुरुवारी आलापल्लीला कामानिमित्त आले होते. काम आटोपून सायंकाळी महाकापाडीला निघाले. तलवाडा येथे आशिष बसच्या प्रतीक्षेत होता. तोच कुमा महाकांचा नातूवर्गीय असल्याने त्याने आशिषला दुचाकीवर घेतलं. तलवाड्यापासून दीड-दोन किलोमीटर अंतरावर सायंकाळी पाच वाजताच्या सुमारास ट्रॅक्टरने भीषण धडक दिली.
रस्त्यावरील नागरिकांनी टायगर ग्रुपला सूचित केलं. साई तुलसीगारी यांनी दोन रुग्णवाहिका घेऊन घटनास्थळी धाव घेतली. कुमा रस्त्यावर गतप्राण पडला होता. मिडको रस्त्याच्या कडेला मृत्यूच्या दारात तडपत होती, तर आशिष जखमी हालचाली करत होता.त्यांना उपचारासाठी तात्काळ रुग्णालयात दाखल करणे गरजेचे होते.मात्र तेंव्हाच अवकाळी पावसाने झाडं कोसळली, विज व नेटवर्क गायब झालं. टायगर ग्रुपने अथक प्रयत्न केले, पण मिडकोने रुग्णवाहिकेतच अंतिम श्वास घेतला. रात्री ९.३० वाजता रस्ता मोकळा करून आशिषला अहेरी उपजिल्हा रुग्णालयात दाखल केलं. डोक्यावरील गंभीर जखमेमुळे त्याला चंद्रपूर रेफर करण्यात आलं.
लिफ्टचं दुःखदं परिणाम
आशिष हा १०वी उत्तीर्ण होऊन पुण्यात अकरावीची परीक्षा पास करून ६ मे रोजी आलापल्लीला आला होता. तलवाड्यात काकांकडे थांबला असताना कुमा दांपत्याने लिफ्ट दिली. दुर्दैवाने तलवाडा गावातीलच ट्रॅक्टरमुळे हे निष्पाप कुटुंब उद्ध्वस्त झालं. ट्रॅक्टर मालकाने आपलाच ट्रॅक्टर असल्याची कबुली दिली.मात्र,पुंगाटी कुटुंबावर दुःखाचा डोंगर कोसळला. या दुःखद घटनेचा अहेरी पोलिस तपास करीत आहेत.
