गडचिरोली: महाराष्ट्र दिनाच्या शुभ प्रसंगी गडचिरोली जिल्हा प्रशासनाने ग्रामीण महिलांना सक्षम करण्यासाठी क्रांतिकारी पाऊल उचलले. सहपालकमंत्री ॲड. आशिष जयस्वाल यांच्या हस्ते अहेरी व एटापल्ली तालुक्यातील सहा महिला प्रभागसंघांना ‘घाटो कट्टा’ (फूड व्हॅन) वितरित करण्यात आल्या. हा ‘गडचिरोली मॉडेल’ संपूर्ण राज्यासाठी प्रेरणादायी ठरेल, असा विश्वास त्यांनी व्यक्त केला.
सुरजागड लोहप्रकल्पाने बाधित झालेल्या भागातील महिलांसाठी हा शाश्वत रोजगाराचा सोन्याचा क्षण आहे. फिरत्या रेस्टॉरंटमधून केवळ नोकरीच नाही, तर दरडोई उत्पन्नात खरी वाढ होईल. सहपालकमंत्र्यांनी सांगितले, “नारीशक्तीला आत्मनिर्भर करण्यासाठी हे उपक्रम मीलाचा दगड आहे.”
‘घाटो कट्टा’ची वैशिष्ट्ये
महिला स्वतः व्हॅन चालवतील आणि सकस जेवण बनवतील. आर-सेटीमार्फत वाहन चालन व खाद्यपदार्थ तयार करण्याचे विशेष प्रशिक्षण.लोहप्रकल्प परिसरातील कर्मचाऱ्यांसाठी शुद्ध, पौष्टिक जेवण वाजवी दरात. प्रत्येकी १४ लाखांची सुसज्ज व्हॅन, एकूण ८८ लाखांची तरतूद.जिल्हा नियोजन समितीच्या ३% निधीतून व जिल्हा खनिज प्रतिष्ठानमार्फत राबवला जाणारा हा उपक्रम दुर्गम भागातील महिलांना व्यावसायिक जगात झेप देणारा आहे.
या भव्य सोहळ्यात उपस्थित दिग्गज
यावेळी जिल्हाधिकारी अविश्यांत पंडा, मुख्य कार्यकारी अधिकारी सुहास गाडे, पोलीस अधीक्षक एम. रमेश, प्रकल्प अधिकारी राहूल काळभोर व उमेद अभियान प्रतिनिधींसह शेकडो महिला बचत गट सदस्य उपस्थित होते.
