गडचिरोली:सकाळी गावातील गुरे चरायला जंगलात गेलेल्या ७६ वर्षीय इसमाचा अचानक वाघाशी सामना झाला. वाघाने अचानक गुराख्यावर हल्ला चढविला. त्याला प्रतिउत्तर म्हणून गुराख्याने हल्ला परतावून लावला. काही वेळ दोघांमध्ये झुंज झाली, परंतु शेतकरी भारी पडल्याने वाघाने पळ काढला. गुराखी आणि वाघांमध्ये झालेला हा थरार गडचिरोली जिल्ह्यातील अहेरी तालुक्यात येत असलेल्या कमलापूर वनपरिक्षेत्रातील चिरेपल्ली बीटात २४ सप्टेंबर रोजी सकाळी साडेनऊ वाजताच्या सुमारास घडला. या घटनेमध्ये गुराखी शिवराम गोसाई बामनकर हे गंभीर जखमी झाले असून त्यांच्यावर आहेरी येथील उपजिल्हा रुग्णालयात उपचार सुरू आहेत.
शिवराम गोसाई बामनकर हे सकाळच्या सुमारास खांदला गावातील जनावरे चराईसाठी घेऊन गेले होते. राजाराम उपेक्षेत्रातील चिरेपल्ली बीटात जनावरे चराई करीत असताना त्या ठिकाणी दबा धरून बसलेल्या वाघाने शिवराम यांच्यावर झडप घातली. त्यांनी वाघाचा हल्ला परतवण्याचा प्रयत्न केला. दोघांमध्ये बराच वेळ झुंज झाला. यात गुराखी शिवराम वाघावर भारी पडल्याने वाघ जंगलात पळ काढला.मात्र, यात शिवराम गंभीर जखमी झाला. रक्तबंबाड अवस्थेत कसाबसा शिवरामने गाव गाठला. त्याच्या शरीरावर ठिकठिकाणी गंभीर जखमा झालेल्या आहेत. त्यांनी थराराची आपबीती कुटुंबीयांना व नागरिकांना सांगितली.लगेच त्याला राजाराम येथील आरोग्य पथकात दाखल केले. येथील वैद्यकीय अधिकाऱ्यांनी प्राथमिक उपचार करून रुग्णवाहिकेने उपजिल्हा रुग्णालय अहेरी येथे हलविले.
७६ वर्षीय शिवरामने वाघाशी दोन हात करून अल्ला परतावून लावला. विशेष म्हणजे म्हातारपणात देखील शिवरामने वाघाच्या हल्ल्याचा जोरदार सामना केला आणि त्याला पळून जाण्यास भाग पाडले. धाडसी गुराखीने मोठ्या हिमतीने वाघाचा प्रतिकार करून त्याला परतावून लावल्याने हा चर्चेचा विषय ठरला असला तरी सध्या या भागात दहशतीचे वातावरण निर्माण झाले आहे.
वनविभागाकडून तात्काळ मदतीची मागणी
शिवराम गोसावी बामनकर चे जनावरे चरईसाठी जंगल परिसरात गेले असता वाघाने हल्ला करून जखमी केले आहे. त्यामुळे वनविभागाने जखमी शिवराम बामणकर यांना तात्काळ मदत द्यावी, अशी मागणी मुलगी वनिता गजानन बामनकर यांनी वनपरिक्षेत्र अधिकारी कमलापूर यांना दिलेल्या निवेदनात म्हटले आहे.
