गडचिरोली:मागील ३८ वर्षापासून नक्षल चळवळीत असलेली जहाल नक्षलवादी, दंडकारण्य स्पेशल झोनल कमिटीची सदस्य आणि नक्षल्यांच्या केंद्रीय समितीचा सदस्य भूपती याची पत्नी विमला सिडाम उर्फ तारक्का हिच्यासह आज ११ नक्षल्यांनी गडचिरोली पोलीस मुख्यालयात मुख्यमंत्री देवेंद्र फडणवीस यांच्या उपस्थितीत पोलिसांपुढे आत्मसमर्पण केले.
यात १ डीकेएसझेडसीएम, ३ डीव्हीसीएम, २ एसीएम व ४ दलम सदस्यांचा समावेश आहे. या सर्वांवर एकूण ८६ लाख ५ हजार रुपयांचे बक्षीस होते. मुख्यमंत्री फडणवीस यांनी आत्मसमर्पण करणाऱ्या नक्षल्यांना संविधानाची प्रत देऊन त्यांचा सत्कार केला.दंडकारण्य स्पेशल झोनल कमिटीची सदस्य तारक्का ही मागील ३८ वर्षांपासून नक्षल चळवळीत होती. नक्षल्यांच्या केंद्रीय समितीचा सदस्य भूपती याची ती पत्नी आहे. तिच्यावर २५ लाख रुपयांचे बक्षीस होते.विमला चंद्रा सिडाम उर्फ तारक्का उर्फ वत्सला उर्फ तारा डीकेएसझेडसीएम तथा केंद्रीय समिती सदस्य भूपती याची पत्नी, सुरेश उईके उर्फ चैतू उर्फ बोटी, डीव्हीसीम कुतुल एरिया कमिटी व त्याची पत्नी कल्पना गणपती तोर्रेम उर्फ भारती उर्फ मदनी (डीव्हीसीएम), अर्जुन तानू हिचामी उर्फ सागर उर्फ सुरेश डीव्हीसीएम राही दलम व त्याची पत्नी सम्भ पांडू मट्टामी उर्फ बंडी (एसीएम डी. के. झोन डॉक्टर टीम), वनिता सुकलू धुर्वे उर्फ सुशीला (एसीएम भामरागड दलम), निशा बोडका हेडो उर्फ शांती उपकमांडर पेरमिली दलम, श्रुती उलगे हेडो उर्फ मन्ना, सदस्य कंपनी क्रमांक १०, शशिकला पतीराम धुर्वे पश्चिम सबझोनल टीम सदस्य, सोनी सुक्कू मट्टामी राही दलम सदस्य, आकाश सामा पुंगाटी उर्फ वत्ते सदस्य प्लाटून नंबर ३२ यांचा आत्मसमर्पण करणाऱ्या नक्षल्यांमध्ये समावेश आहे.
याप्रसंगी बोलताना देवेंद्र फडणवीस म्हणाले की,जिल्हा प्रशासन आणि पोलिस विभाग करीत असलेल्या विकासकामांमुळे मागील चार वर्षात नक्षल चळवळीत एकही नवीन भरती झाली नाही,गडचिरोली पोलिस दलाच्या कामगिरीची प्रसंशा करतानाच त्यांनी विविध चकमकींमध्ये उल्लेखनीय कामगिरी करणाऱ्या पोलिस अधिकारी आणि कर्मचाऱ्यांचाही त्यांनी सत्कार केला.
कोण आहे जहाल नक्षलवादी तारक्का?
६२ वर्षीय तारक्का नक्षल्यांच्या दंडकारण्य स्पेशल झोनल कमिटीची सदस्य तसेच दंडकारण्य विभागाची मेडिकल टीमची इंचार्ज होती. अहेरी तालुक्यातील किष्टापूर येथील मूळ रहिवासी असलेली तारक्का ही मागील ३८ वर्षांपासून नक्षल चळवळीत होती. नक्षल्यांच्या केंद्रीय समितीचा सदस्य भूपती याची ती पत्नी आहे.अनेक चकमकी आणि खुनांमध्ये तिचा सहभाग होता. ८ नोव्हेंबर २०१० रोजी लाहेरी-मलमपोडूर गावांच्या मध्ये झालेल्या चकमकीत १७ पोलिस शहीद झाले होते. या चकमकीचे नेतृत्व तारक्काने केले होते. शिवाय त्याचा व्हीडिओही तारक्काने त्यावेळी व्हायरल केला होता.
