गोंडपिपरी : नागेश इटेकर :- अन्न सुरक्षा कायद्यानुसार प्रतिबंधित तंबाखूजन्य पदार्थांच्या विक्रीवर निर्बंध असतानाही गोंडपिपरी शहरासह तालुक्यात सुगंधित तंबाखूजन्य ‘खर्रा’ व इतर तंबाखूजन्य पदार्थांची विक्री सुरू असल्याची चर्चा आहे. पानटपऱ्या, किराणा दुकाने तसेच काही ठिकाणी छुप्या पद्धतीने हा व्यवसाय सुरू असल्याचे चित्र असून, एका खर्रासाठी ४० ते ५० रुपये आकारले जात असल्याची माहिती समोर येत आहे.
गोंडपिपरी शहरातील गल्लीबोळांपासून ग्रामीण भागापर्यंत काही ठिकाणी पानटपऱ्यांच्या आडून खर्रा विक्री केली जात असल्याचे नागरिकांचे म्हणणे आहे. विशेष म्हणजे शाळा व महाविद्यालयांच्या परिसरातही तंबाखूजन्य पदार्थांची विक्री होत असल्याच्या तक्रारी आहेत. त्यामुळे भावी पिढीच्या आरोग्यावर त्याचा विपरीत परिणाम होण्याची शक्यता व्यक्त केली जात आहे.
तंबाखूजन्य पदार्थांच्या सेवनामुळे कर्करोग, हृदयरोग, मधुमेह तसेच दीर्घकालीन श्वसनविकारांसह विविध गंभीर आजारांचा धोका वाढतो. त्यामुळे अशा पदार्थांच्या विक्रीवर प्रभावी नियंत्रण ठेवणे आवश्यक असताना, स्थानिक पातळीवर कारवाई होत नसल्याची नागरिकांची नाराजी आहे.
खर्र्याचे व्यसन लागलेल्या व्यक्तींमध्ये त्याची मागणी मोठी असल्याने हा व्यवसाय कमी भांडवलात अधिक नफा मिळवून देणारा ठरत असल्याचे बोलले जाते. पुरुषांसोबतच महिला आणि अल्पवयीन मुलांमध्येही तंबाखूजन्य पदार्थांच्या सेवनाचे प्रमाण वाढत असल्याने हा प्रकार अधिक चिंताजनक बनला आहे.
दरम्यान, काही ठिकाणी बनावट अथवा निकृष्ट दर्जाचे तंबाखूजन्य पदार्थ विकले जात असल्याच्या तक्रारीही नागरिकांकडून केल्या जात आहेत. या पार्श्वभूमीवर संबंधित विभागाने गोंडपिपरी शहर व तालुक्यातील पानटपऱ्या, किराणा दुकाने तसेच शाळा-महाविद्यालय परिसराची तपासणी करून नियमांचे उल्लंघन करणाऱ्यांवर कारवाई करावी, अशी मागणी होत आहे. खर्रा विक्रीला आळा घालण्यासाठी प्रशासनाकडून ठोस कारवाई कधी होणार, असा सवाल नागरिकांकडून उपस्थित केला जात आहे.
