भामरागड:- सीजेपी चे संस्थापक अध्यक्ष अभिजित दिपके यांनी गडचिरोली जिल्हा दौऱ्याच्या दुसऱ्या दिवशी भामरागड तालुक्यातील विविध ठिकाणांच्या शाळांना भेट दिली. यावेळी विद्यार्थ्यांना मिळणाऱ्या मूलभूत सुविधांची दयनीय अवस्था समोर आली.
सर्वप्रथम त्यांनी नगरपंचायत क्षेत्रातील ताडगाव येथील जिल्हा परिषद शाळेला भेट दिली.या शाळेत पिण्याच्या पाणी करिता जल शुद्धिकरणाचे मशीन बसविण्यात आले पण ते बसविल्यापासून बंदवस्थेत आहे,वर्गखोल्यांमध्ये वीज आणि पंख्याची सोय नाही अशा जीर्ण झालेल्या इमारतीत विद्यार्थ्यांना बसवून शिक्षण दिले जात असून हा विद्यार्थ्यांच्या जीवाशी खेळ नाही का? एखादी दुर्घटना घडल्यानंतरच प्रशासनाला जाग येणार का? असा सवाल यावेळी उपस्थित करण्यात आला तसेच याठिकाणी निर्लेखीत झालेल्या इमारतीमध्ये गॅस चा वापर न करता चुलीवर मध्यन्ह भोजन बनविला जात होता आणि या कामावर दोन महिलांना राबवून घेऊन त्यांना प्रत्येकी दोन हजार पाचशे रुपये दिले जातं असल्याची धक्कादायक माहिती पुढे आली आहे.या सर्व गंभीर बाबी संदर्भात दिपके यांनी भामरागड येथील गटशिक्षणाधिकाऱ्यांशी दूरध्वनीवरून संवाद साधून तातडीने तोडगा काढण्याची मागणी केली.प्रशासनाने लक्ष न दिल्यास गावकरी आणि पालकांनी एकत्र येऊन आंदोलन करावे असे आवाहनही त्यांनी ग्रामस्थांना केले. विद्यार्थ्यांच्या सुरक्षिततेसाठी नवीन शाळा इमारत बांधणे गरजेचे असल्याचे मत यावेळी व्यक्त करण्यात आले.त्यानंतर दिपके यांनी भामरागड मुख्यालयातील भगवंतराव माध्यमिक अनुदानित आश्रमशाळेला भेट दिली.तेथे वसतिगृहात विद्यार्थ्यांना झोपण्यासाठी पुरेसे बेड नाहीत,शौचालयांची दुरवस्था झाली आहे, मुलींच्या शौचालयाला दार नसल्याचे प्रकार उघडकीस आला तसेच विद्यार्थ्यांना दिवसातून केवळ एकदाच पाणी दिले जाते आणि रात्री पाण्याची कोणतीही सोय नसल्याची तक्रार विद्यार्थ्यांनी केली.ग्रामीण आणि दुर्गम भागातील आदिवासी विद्यार्थ्यांना सुरक्षित निवास, स्वच्छ पाणी, शौचालये आणि शिक्षणासाठी आवश्यक सर्व मूलभूत सुविधा मिळणे गरजेचे असून यावर विद्यार्थ्यांचा पूर्ण हक्क आहे कारण शासनाकडून महिना काठी प्रत्येक विद्यार्थ्यांचा मागे मोठ्या प्रमाणात अनुदान देत आहे तर याचा फायदा विद्यार्थ्यांना देने शालेय प्रशासनाला बंधनकारक आहे असे यावेळी अधोरेखित करण्यात आले. या भेटीदरम्यान शिक्षक, विद्यार्थी आणि स्थानिक नागरिकांशी संवाद साधून त्यांच्या अडचणी जाणून घेण्यात आल्या.
