भामरागड :- तालुक्यातील हिदूर-दोबूर मुख्य रस्त्यावर माओवाद्यांनी बॅनर आणि पत्रके टाकून पुन्हा दहशत निर्माण केल्याची घटना उघडकीस आली आहे. तालुका मुख्यालयापासून अवघ्या 8 ते 9 किमी अंतरावर घडलेल्या या प्रकारामुळे परिसरात तणावाचे वातावरण निर्माण झाले आहे.
माओवाद्यांनी 26 जुलै 2026 ते 30 जुलै 2026 या कालावधीत संपूर्ण गडचिरोली जिल्हा बंद ठेवण्याचे आवाहन केले आहे. जल, जंगल आणि जमिनीच्या हक्कांसाठी लढताना अनेक “सहकारी शहीद” झाल्याचा दावा करत, त्यांच्या स्मरणार्थ बंद पाळावा असे पत्रकात नमूद करण्यात आले आहे.
जिल्ह्यात कंपन्यांचा वाढता शिरकाव, पोलीस ठाण्यांची वाढती संख्या आणि स्थानिकांच्या भविष्यासाठी नैसर्गिक साधनसंपत्ती धोक्यात येत असल्याचा आरोपही करण्यात आला आहे. त्यामुळे जनतेने जल, जंगल आणि जमिनीच्या संरक्षणासाठी एकत्र यावे, असे आवाहन माओवाद्यांनी केले आहे.
या घटनेमुळे दुर्गम भागातील सुरक्षेच्या दृष्टीने पुन्हा सतर्कता वाढवण्याची गरज निर्माण झाली असून, स्थानिक नागरिकांमध्ये भीतीचे वातावरण आहे.
