बदलापूर प्रतिनिधी: घरात खेळत असलेल्या अवघ्या तीन वर्षीय चिमुकल्याचा सर्पदंशामुळे मृत्यू झाल्याची हृदयद्रावक घटना अंबरनाथमध्ये घडली आहे. या घटनेनंतर उल्हासनगर येथील शासकीय मध्यवर्ती रुग्णालयाच्या कार्यपद्धतीवर गंभीर प्रश्नचिन्ह उपस्थित झाले आहे. आधी सापाचा फोटो दाखवा, मगच उपचार सुरू करू, असा आग्रह डॉक्टरांनी धरल्यामुळे उपचारास विलंब झाला आणि त्यातच मुलाचा मृत्यू झाला, असा गंभीर आरोप कुटुंबीयांनी केला आहे. मात्र, रुग्णालय प्रशासनाने हे आरोप फेटाळून लावत उपचारात कोणतीही दिरंगाई झाली नसल्याचा दावा केला आहे.
अंबरनाथच्या पूर्व भागात शिलाहारकालीन शिवमंदिर जवळील प्रकाश नगर भागात सुलतान शेख हा ३ वर्षांचा चिमुरडा आपल्या घरात खेळत होता. खेळत असतानाच अचानक एका विषारी सापाने त्याच्या कमरेला दंश केला. सुलतानला सर्पदंश झाल्याचे लक्षात येताच त्याच्या कुटुंबीयांनी अत्यंत घाबरलेल्या अवस्थेत त्याला तात्काळ उपचारासाठी उल्हासनगर येथील मध्यवर्ती रुग्णालयात धाव घेतली. रुग्णालयात पोहोचल्यानंतर कर्तव्यावर असलेल्या डॉक्टरांनी मुलावर तातडीने उपचार सुरू करण्याऐवजी, कोणता साप चावला आहे ते समजण्यासाठी आधी त्या सापाचा फोटो दाखवा, मगच उपचार करू असा अजब अट्टाहास धरल्याचा आरोप शेख कुटुंबीयांनी केला आहे.सापाचा फोटो शोधण्यात आणि डॉक्टरांशी वाद घालण्यात मौल्यवान वेळ वाया गेला आणि याच दिरंगाईमुळे उपचाराला उशीर होऊन सुलतानचा मृत्यू झाला, असा दावा नातेवाईकांनी केला आहे. हसण्या व खेळण्याच्या वयात मुलाचा डोळ्यादेखत मृत्यू झाल्याने संतप्त आणि दुःखी झालेल्या नातेवाईकांनी रुग्णालयात तीव्र संताप व्यक्त करत गोंधळ घातला.
मध्यवर्ती रुग्णालयातील प्रशासनाने आणि संबंधित डॉक्टरांनी शेख कुटुंबीयांचे सर्व आरोप पूर्णपणे फेटाळून लावले आहेत. बालकाला रुग्णालयात आणले तेव्हा त्याची प्रकृती आधीच कमालीची खालावली होती. डॉक्टरांनी कोणतीही दिरंगाई न करता उपलब्ध वैद्यकीय उपचार पद्धतीनुसार तात्काळ उपचार सुरू केले होते, असा दावा रुग्णालयाकडून करण्यात आला आहे. बालकाला रुग्णालयात आणण्यास कुटुंबीयांकडूनच उशीर झाला असावा आणि विष शरीरात वेगाने पसरल्यामुळे उपचारादरम्यान त्याचा मृत्यू झाला, असे स्पष्टीकरण रुग्णालयाने दिले आहे. आता या प्रकरणात नक्की चूक कोणाची, याचा तपास पोलीस करत आहेत.
