अहेरी: खरीप हंगाम २०२५ मध्ये ई-पीक पाहणीची ऑनलाइन नोंद न करता आलेल्या शेतकऱ्यांसाठी महत्त्वाची बातमी असून शेतकऱ्यांनी काही कारणास्तव नोंद करू शकले नसल्यास आता ऑफलाइन पाहणीद्वारे पिकांची नोंद करता येईल. महसूल व वन विभागाने १४ डिसेंबर २०२५ रोजी विशेष शासन निर्णय जारी केला असून,तहसीलदार अहेरी यांच्या वतीने सर्व शेतकऱ्यांना तात्काळ अर्ज सादर करण्याचे आवाहन करण्यात आले आहे.
ग्राम महसूल अधिकारी यांच्याकडे १७ ते २४ डिसेंबर पर्यंत अर्ज करा. त्यानंतर २५ डिसेंबर ते ७ जानेवारी २०२६ दरम्यान ग्रामस्तरीय समिती (मंडळ अधिकारी अध्यक्षतेखाली ग्राम महसूल अधिकारी, ग्राम विकास अधिकारी व सहायक कृषी अधिकारी) शेतात प्रत्यक्ष पाहणी करेल. पाहणीपूर्वी शेतकऱ्यासोबतच शेजारच्या ४-५ शेतकऱ्यांनाही सूचना दिली जाईल.पाहणीवेळी शेतकऱ्याने खरीप हंगामात घेतलेल्या पिकाची स्थानिक चौकशी होईल. शेजारच्या शेतकऱ्यांचे जाबजबाब नोंदवून वस्तुस्थिती दर्शक पंचनामा तयार केला जाईल.
ही सुविधा फक्त गाव नमुना नं. १२ वर नोंद नसलेल्या शेतकऱ्यांसाठी असून विमा अनुदान व इतर लाभांसाठी हे महत्त्वाचे.या निर्णयाने अनेक शेतकऱ्यांना दिलासा मिळणार असून गावागावांत जागरूकता मोहीम राबवून शेतकऱ्यांना सहकार्य करण्याचे आवाहन अहेरीचे तहसीलदार बालाजी सोमवंशी यांनी केले आहे.
