अहेरी : परिस्थिती कोणतीही असो, जिद्द, मेहनत आणि योग्य मार्गदर्शनाच्या बळावर यशाचे शिखर गाठता येते, याचा प्रत्यय अहेरी तालुक्यातील रायगट्टा येथील रवींद्र भंडारवार यांच्या प्रवासातून येतो. अनुदानित आश्रमशाळेत दररोज तीन किलोमीटरची पायपीट करत शिक्षण घेणारे भंडारवार आज अधिकारीपदापर्यंत पोहोचले आहेत. नुकतीच त्यांची वाशिम जिल्ह्यात जिल्हा समाजकल्याण अधिकारी म्हणून नियुक्ती झाली असून, या नव्या जबाबदारीपूर्वी त्यांनी आपल्या प्राथमिक शिक्षण झालेल्या राजाराम खांदला येथील भगवंतराव प्राथमिक तथा माध्यमिक आश्रमशाळेला भेट दिली. आपल्या शाळेत शिकलेला विद्यार्थी अधिकारी बनून परतल्याचे पाहून शिक्षकांचा ऊर अभिमानाने भरून आला.
रायगट्टा हे त्यांचे मूळ गाव. लगतच्या राजाराम खांदला येथील भगवंतराव आश्रमशाळेत त्यांनी प्राथमिक शिक्षण पूर्ण केले. दररोज तीन किलोमीटरची पायपीट करत शिक्षण घेणाऱ्या भंडारवार यांनी शिक्षक आणि कुटुंबीयांच्या मार्गदर्शनातून पुढील शिक्षणासाठी तालुक्याचे मुख्यालय आणि त्यानंतर शहर गाठले. स्पर्धा परीक्षांची तयारी करत त्यांनी उपमुख्याधिकारी पदापर्यंत मजल मारली. बल्लारपूर आणि गडचिरोली नगर परिषदेत उपमुख्याधिकारी म्हणून सेवा बजावल्यानंतर आता त्यांची वाशिम जिल्ह्यात समाजकल्याण अधिकारी म्हणून नियुक्ती झाली आहे.
नियुक्तीनंतर गावाकडे आले असता त्यांनी आपल्या शाळेला आवर्जून भेट दिली. शाळेची पाहणी करत त्यांनी जुन्या आठवणींना उजाळा दिला. विशेष म्हणजे, त्यांना शिकविणारे काही शिक्षक आजही याच शाळेत कार्यरत आहेत. आपल्या हातून शिकलेला विद्यार्थी अधिकारी म्हणून शाळेत परतल्याचे पाहून या शिक्षकांना विशेष आनंद झाला. मुख्याध्यापक टी. सी. ओडनालवार आणि शिक्षकवृंदांनी पुष्पगुच्छ देऊन त्यांचे स्वागत केले. विद्यार्थ्यांसमोर आपल्या माजी विद्यार्थ्याचा झालेला हा सन्मान उपस्थितांसाठी अभिमानाचा क्षण ठरला.
यावेळी भंडारवार यांनी शाळेतील विद्यार्थ्यांशी संवाद साधत त्यांना शिक्षणाचे महत्त्व पटवून दिले. आश्रमशाळेत शिकतो म्हणून कोणीही स्वतःला कमी समजू नये. शाळा कोणतीही असो, विद्यार्थ्यांनी जिद्दीने आणि मेहनतीने अभ्यास केला, शिक्षकांचे मार्गदर्शन घेतले आणि ध्येय निश्चित केले, तर यश नक्कीच मिळू शकते, असा मोलाचा संदेश त्यांनी दिला. स्पर्धा परीक्षांची तयारी करताना सातत्य, आत्मविश्वास आणि कठोर परिश्रम यांना पर्याय नसल्याचेही त्यांनी विद्यार्थ्यांना समजावून सांगितले.
आपल्या आयुष्याला आकार देणाऱ्या शाळेविषयी कृतज्ञता व्यक्त करताना भंडारवार यांनी जुन्या आठवणींना उजाळा दिला.
ज्या शाळेने शिक्षणाचा पाया घातला, त्याच शाळेत अधिकारी म्हणून पुन्हा येण्याचा आनंद त्यांच्या भेटीतून दिसून आला.
दुसरीकडे, प्रतिकूल परिस्थितीत शिक्षण घेऊन यश मिळविणाऱ्या आपल्या विद्यार्थ्याचा प्रवास पाहून शिक्षकांनाही समाधान वाटले.
एका विद्यार्थ्याचे अधिकारीपदापर्यंत पोहोचणे हा केवळ त्याच्या कुटुंबाचा नव्हे, तर त्याला घडविणाऱ्या शाळेचाही गौरव असतो. रवींद्र भंडारवार यांची ही भेट आश्रमशाळेतील विद्यार्थ्यांसाठी प्रेरणादायी ठरली असून, जिद्द आणि मेहनतीच्या जोरावर आपणही अधिकारी बनू शकतो, हा आत्मविश्वास त्यांच्या मनात निर्माण करणारी ठरली.
