गडचिरोली : जिल्ह्यात दारूबंदी असतानाही अवैध दारूची वाहतूक करण्यासाठी तस्करांकडून नवनवीन शक्कल लढवली जात असल्याचे समोर आले आहे. चक्क दुचाकीच्या पेट्रोल टाकी आणि सीटच्या आतील भागात देशी दारूच्या निपा लपवून वाहतूक करण्याचा प्रयत्न गडचिरोली पोलिसांनी उधळून लावला. या कारवाईत दोन तरुणांना ताब्यात घेत दोन दुचाकींसह एकूण २ लाख ३२ हजार रुपयांचा मुद्देमाल जप्त करण्यात आला.
गडचिरोली ते चंद्रपूर मार्गावरील वैनगंगा नदीजवळ १८ ऑक्टोबर रोजी नाकाबंदी सुरू असताना पोलिसांना गोपनीय माहिती मिळाली. त्यानुसार पोलिसांनी संशयास्पद दुचाकींवर नजर ठेवली असता, दोन तरुण भरधाव वेगाने गडचिरोलीच्या दिशेने येताना दिसले. पोलिसांनी त्यांना थांबवून चौकशी केली असता, तानाजी नानाजी पेंदोरकर (वय ३२) आणि सौरभ प्रकाश महाजनवार (वय १९), दोघेही रा. व्याहाड (बु.), ता. सावली, जि. चंद्रपूर, अशी त्यांची नावे निष्पन्न झाली.
पेट्रोल टाकी अन् सीटमध्ये दारूचा साठा!
पंचांसमक्ष दोन्ही दुचाकींची तपासणी केली असता, वाहनांच्या पेट्रोल टाकी व सीटच्या आतील भागात दारूच्या निपा लपवून ठेवल्याचे आढळले. एका दुचाकीत ९० मिली क्षमतेच्या रॉकेट संत्रा देशी दारूच्या २०० निपा, किंमत १६ हजार रुपये, तर दुसऱ्या दुचाकीतही तितक्याच निपा आढळल्या. दोन्ही वाहनांतील दारूची एकूण किंमत ३२ हजार रुपये असून, वाहतुकीसाठी वापरण्यात आलेल्या दोन दुचाकींची अंदाजित किंमत २ लाख रुपये आहे. अशा प्रकारे पोलिसांनी एकूण २ लाख ३२ हजार रुपयांचा मुद्देमाल जप्त केला.
दोघांविरुद्ध गुन्हा दाखल
या प्रकरणी गडचिरोली पोलीस ठाण्यात गुन्हा क्रमांक १५६६/२०२६ अन्वये महाराष्ट्र दारूबंदी कायद्याच्या कलम ६५(अ) व ८३ अंतर्गत दोन्ही आरोपींविरुद्ध गुन्हा नोंदविण्यात आला आहे. पुढील तपास गडचिरोली पोलीस करीत आहेत.
सीमांवर २४ तास नाकाबंदी
गडचिरोली जिल्ह्यात अवैध दारू विक्री व वाहतुकीला आळा घालण्यासाठी जिल्ह्याच्या सीमांवर २४ तास नाकाबंदी राबविण्यात येत आहे. अवैध व्यवसायांविरुद्ध कठोर कायदेशीर कारवाई सुरूच राहील, असे पोलीस अधीक्षक एम. रमेश यांनी स्पष्ट केले.
ही कारवाई पोलीस अधीक्षक एम. रमेश यांच्या आदेशानुसार, अपर पोलीस अधीक्षक (अभियान) कार्तिक मधीरा, अपर पोलीस अधीक्षक गोकुल राज जी. आणि प्रभारी सहायक पोलीस अधीक्षक सुयश सिंग यांच्या मार्गदर्शनाखाली, गडचिरोली पोलीस ठाण्याचे प्रभारी अधिकारी पोलीस निरीक्षक विनोद चव्हाण यांच्या नेतृत्वात करण्यात आली.
